Монгол Улсын иргэн Ш.Алтантуяа Малайз улсад бусдын гарт онц хэрцгийгээр амиа алдсан. Энэ хэргийг үнэн зөвөөр шийдвэрлүүлж, уучлалт гуйлгахын тулд талийгаачийн аав С.Шаарийбуу гуай 20 гаруй жилийн турш шат шатны шүүхэд хандсаар буй.
Хамгийн сүүлд энэ оны нэгдүгээр сарын 20-нд болсон шүүх хурлаар Малайз Улсын Засгийн газрыг хариуцлагаас чөлөөлсөн байдаг. Иймд С.Шаарийбуу дараагийн шатны шүүх буюу Холбооны шүүхэд хандсан байна. Холбооны шүүхэд хандсанаар Засгийн газар нь иргэнийхээ талаар асуудал дэвшүүлэх эрх нээгддэг тул Ерөнхий сайдад хандсан талаараа сэтгүүлчдэд мэдээлэл өглөө.
Иргэн С.Шаарийбуу "Монголын төрд анх удаа хандлаа. Сайхан хүлээж авдаг юм байна. Асуудлыг маш шуурхай шийдсэн. Би өргөдлөө бичээд орсон.
20 жил миний эсрэг Малайзын Засгийн газар өргөдлөө гаргаж явсан. Надтай давж заалдсан. Иргэн хүнтэй бүхэл бүтэн улсын хууль шүүхийн байгууллага, төр нь оролцоно гэдэг надад дааж давшгүй. Тэнд байгаа эмэгтэй өмгөөлөгч, манай Баяр гээд бид гурав 20 жил зүтгэлээ. Энэ удаа аргагүйн эрхэд би Холбооны шүүхэд давж заалдсан. Миний боломж энэ л байсан.
Иргэн нь Холбооны шүүхэд давж заалдвал Монгол Улсын Засгийн газар иргэнийхээ төлөө асуудал тавих эрх нээгддэг. Түүнээс өмнө бол Нэгдсэн Үндэстний Байгууллага(НҮБ)-ын конвенц, олон улсын дүрмээрээ боломжгүй байдаг.
Иймээс би санал тавьсан. Хүлээж авсанд талархаж байна. Үр дүнд нь Засгийн газраас Ажлын хэсэг байгуулахаар болсон. Үүнд хүний эрхийн байгууллага, хуульчид, Засгийн газрын төлөөлөл болон би багтана.
Агуулга, түвшин, ач холбогдол нь өөр нөхцөлд шийдвэрлэгдэхээр болж байгаа нь хамгийн чухал" гэлээ.
СЭТГЭГДЭЛ БИЧИХ