АНУ-ын Ерөнхийлөгч Дональд Трамп Ираны гүүр, цахилгаан станц зэрэг дэд бүтцийн байгууламжуудад цохилт өгөх боломжтой талаар анхааруулсны дараа Ираны хэд хэдэн хотод иргэд эмзэг объектуудыг хамгаалах зорилгоор цугларсан тухай BBC мэдээлэв.
Мэдээлэлд дурдсанаар, Тегеран болон бусад хотуудад иргэд цахилгаан станц, гүүр, стратегийн ач холбогдолтой байгууламжуудын орчимд цугларч, "амьд гинж" үүсгэн зогссон аж. Зарим газарт оюутнууд, сайн дурын бүлгүүд, орон нутгийн иргэд хамтран оролцсон талаар мэдээллээ.
Гэхдээ энэ хөдөлгөөн бүх нийтийг хамарсан эсэх нь тодорхойгүй бөгөөд тухайн арга хэмжээ нь зарим хот, тодорхой объектуудын орчимд зохион байгуулагдсан байж болзошгүй гэж ажиглагчид үзэж байна. Мөн зарим мэдээлэлд ийм арга хэмжээ нь иргэдийн санаачилгаас гадна орон нутгийн байгууллагуудын дэмжлэгтэйгээр зохион байгуулагдсан байж болзошгүй талаар дурдсан байна.
Шинжээчдийн үзэж байгаагаар, гадаад цэргийн дарамт нэмэгдэх үед дотоод улс төрийн байр суурь ялгаатай байсан иргэд ч дэд бүтэц, стратегийн объектуудыг хамгаалах байр суурь баримтлах нь түгээмэл үзэгдэлд тооцогддог. Үүнтэй зэрэгцэн Иранд дотоод зөрчил, эдийн засгийн хүндрэл хэвээр байгаа тул олон нийтийн хандлага нэгэн жигд болсон гэж үзэхэд эрт байгааг ч онцолжээ..
Сүүлийн өдрүүдэд Иранд дипломат хэлэлцээний оролдлого эхэлсэн гэх мэдээлэл гарч буй ч газар дээрх нөхцөл байдал эмзэг хэвээр байгаа бөгөөд иргэдийн ийм төрлийн хөдөлгөөнүүд нь бүс нутгийн хурцадмал байдал бүрэн намжаагүйг илтгэж байна.
СЭТГЭГДЭЛ БИЧИХ