Японы Ерөнхий сайд Санаэ Такаичи өвлийн хүйтэнд хугацаанаас өмнө парламентын сонгууль зарласан эрсдэлтэй шийдвэр нь амжилттай болж, түүний удирдсан эрх баригч эвсэл доод танхимд хоёрны гуравт хүрэх үнэмлэхүй олонх авах төлөвтэй байна. Ингэснээр Такаичи Японы түүхэнд анхны эмэгтэй Ерөнхий сайд болж, бодлогоо саад багатай хэрэгжүүлэх өргөн боломжтой боллоо.
Консерватив улстөрч гэгддэг Такаичи сонгуулийн кампанит ажлын үеэр татварыг бууруулах, батлан хамгаалах салбарт илүү их хөрөнгө оруулах амлалт өгсөн. Мөн цагаачлалын журмыг чангатгах, Японы газар нутгийг гадаадын иргэд, компани эзэмшихэд тавьсан хязгаарлалтыг дахин хянахаа мэдэгдсэн нь дэмжигч, шүүмжлэгчдийн анхаарлыг татсан юм. Шүүмжлэгчид эдгээр бодлого нь Японы эдийн засагт эрсдэл дагуулж болзошгүйг анхааруулж байна.
Гадаад бодлогын хүрээнд Такаичи АНУ-тай харилцаагаа ойртуулахыг эрмэлзэж, сонгуулиас хэдхэн хоногийн өмнө АНУ-ын Ерөнхийлөгч Дональд Трамп түүнийг олон нийтэд ил тод дэмжсэн нь онцлох үйл явдал болов. Трамп өөрийн Truth Social сүлжээнд Такаичийг “хүчтэй, ухаалаг удирдагч гэдгээ аль хэдийн нотолсон” хэмээн бичсэн нь Японы сонгуулийн кампанит ажилд ховор тохиолдол байлаа.
Санал хураалтын дараа Трамп Такаичи болон түүний эвслийг “түүхэн хэмжээний ялалт байгуулсанд” баяр хүргэж, Японы ард түмнийг үргэлж дэмжинэ хэмээн мэдэгдсэн байна. Мөн Токиогийн хөрөнгийн зах зээл нээгдэхэд Nikkei-ийн индекс 5 гаруй хувиар өссөн бол иен бусад томоохон валютын эсрэг сулрав. Харин засгийн газрын бондын ханш буурсан нь төрийн зардал тэлэх хүлээлттэй холбоотой гэж шинжээчид тайлбарлаж байна.
СЭТГЭГДЭЛ БИЧИХ