АНУ-ын Ерөнхийлөгч Дональд Трамп Баасан гарагт, өөрийн сошиал хуудсанд Барак Обама болон түүний гэргий Мишель Обамаг сармагчинтай зүйрлэн дүрсэлсэн арьс өнгөөр ялгаварласан агуулгатай бичлэг нийтэлж, уг үйлдлээсээ уучлал гуйхаас татгалзлаа. Тэрбээр уг бичлэгийн төгсгөлийн хэсэгт байсан доромж агуулгыг өөрөө үзээгүй, алдаа гаргасан нь ажилтны буруу гэж тайлбарлав.
Трамп энэ тайлбараа “Air Force One” онгоцон дээр сэтгүүлчдэд өгсөн бөгөөд энэ нь уг бичлэгийн тодорхой хэсгийг өөрөө үзсэн гэдгээ хүлээн зөвшөөрсөн. Тухайн бичлэг Пүрэв гарагийн шөнө нийтлэгдэж, бараг 12 цагийн турш олон нийтэд ил байсны дараа Бүгд найрамдах болон Ардчилсан намын гишүүдийн аль алинаас нь хүчтэй шүүмжлэл ирсний улмаас устгагдсан байна.
-Бүгд найрамдах намын зарим гишүүд уучлал гуйхыг шаардсан талаар асуухад Трамп:
“Үгүй. Би алдаа гаргаагүй,” хэмээн хариулжээ.
-Харин арьс өнгөөр ялгаварласан хэсгийг буруушааж байна уу гэсэн асуултад:
“Мэдээж буруушааж байна,” гэж хэлсэн байна.
-Тэрбээр мөн уг бичлэг Хар арьст сонгогчдын дунд Бүгд найрамдах намын нэр хүндэд нөлөөлөх үү гэхэд:
“Үгүй. Би бол сүүлийн олон арван жилд байсан хамгийн арьс өнгөөр ялгаварладаггүй ерөнхийлөгч,” гэж өөрийгөө тодорхойлсон аж.
Энэхүү бичлэг нь Ардчилсан болон Бүгд найрамдах намын гишүүдийн аль алинаас хурц шүүмжлэл хүлээсэн юм. Тухайлбал, Сенатын цорын ганц Хар арьст Бүгд найрамдах гишүүн Тим Скотт уг бичлэгийг “Цагаан ордноос гарсан хамгийн жигшим арьс өнгөөр ялгаварласан үзэл” хэмээн тодорхойлж, нэн даруй устгахыг шаарджээ. “Хуурамч байгаасай гэж залбирч байна. Ерөнхийлөгч үүнийг устгах ёстой,” гэж Тим Скотт X платформд бичсэн байна. Бичлэгийн төгсгөл хэсэгт Обамагийн гэр бүлийн царайг сармагчны биед эвлүүлэн байрлуулсан дүрс ойролцоогоор нэг секунд гарч, “The Lion Sleeps Tonight” дуу эгшиглэсэн нь Хар арьст хүмүүсийг сармагчинтай зүйрлэдэг эртний арьс өнгөөр ялгаварласан хэвшмэл ойлголтыг санагдуулсан юм.
Ерөнхийлөгчийн албан ёсны сошиал хаягаар нийтлэгдсэн аливаа агуулга нь хувь хүний байр суурь төдийгүй төрийн бодлогын нүүр царай болдог тул “ажилтны алдаа” гэх тайлбар олон нийтийг тайвшруулж чадсангүй. Трамп бичлэгийн арьс өнгөөр ялгаварласан хэсгийг буруушааж буйгаа илэрхийлсэн ч уучлал гуйхаас татгалзсан нь Бүгд найрамдах нам доторх зөрчлийг ил болгож, сонгуулийн өмнөх нөхцөлд намын эв нэгдэлд сөргөөр нөлөөлөх эрсдэлийг нэмэгдүүлэв. Ялангуяа сонгуулийн өрсөлдөөн ширүүн явагддаг муж, тойргуудад нэр дэвшигчид Ерөнхийлөгчийн энэхүү байр суурийг хамгаалах эсвэл түүнээс зай барих хүнд сонголттой тулгарч байна.
Нөгөө талаас, Обамагийн гэр бүлийг доромж утгаар дүрсэлсэн бичлэг нь АНУ-ын нийгэмд арьс өнгөөр ялгаварлах үзэл бүрэн арилж амжаагүй, улс төрийн зорилгоор худал мэдээлэл, доромжлолыг ашиглах хандлага хэвээр байгааг санууллаа. Сонгуулийн луйврын тухай няцаагдсан мэдээллийг түгээхтэй хавсарч гарсан энэхүү дүрслэл нь улс төрийн туйлшрал, мэдээллийн хариуцлагын асуудлыг улам хурцатгаж байна.
Эцэст нь, уг хэрэг нь зөвхөн нэг бичлэгийн тухай маргаан биш, харин төрийн тэргүүний үг үйлдэл, сошиал орчин дахь хариуцлага, ардчилсан нийгэмд хүлээх ёс зүйн босго хаана байх ёстой вэ гэсэн илүү том асуултыг АНУ-ын улс төрийн тавцанд дахин тавьж байна. Сонгуулийн уур амьсгал халж буй энэ үед уг асуултын хариулт нь зөвхөн нэг намын төдийгүй Америкийн нийгмийн ирээдүйн өнгө төрхийг тодорхойлох ач холбогдолтой юм.
Эх сурвалж: CNN
СЭТГЭГДЭЛ БИЧИХ