Ким Жон Ун БНХАУ-д олон улсын анхны олон талт уулзалтад оролцохоор хүрэлцэн ирсэн нь гарцаагүй олны анхаарлыг татах үйл явдал байв. Гэвч өнгөрсөн есдүгээр сард галт тэрэгнээс бууж ирэх үед нь түүний ард охин нь зогсож байсан нь Солонгос судлаачдын анхаарлыг илүүтэй татсан юм. Тэр бол Умард Солонгосын удирдагчийн охин Ким Жү Ае байлаа.
Өмнөд Солонгосын тагнуулын байгууллага Ким Жон Ун охиноо өөрийн залгамжлагчаар сонгосон гэж пүрэв гарагт хууль тогтоогчдод мэдээлсэн байна. Түүний тухай анхны мэдээлэл санаанд оромгүй эх сурвалжаас гарч ирсэн. Сагсан бөмбөгийн тамирчин Деннис Родман 2013 онд The Guardian сонинд өгсөн ярилцлагадаа нууцлаг улсад айлчлах үеэрээ тэдний Жү Ае хэмээх хүүхдийг тэвэрч байсан гэж ярьсан байдаг. Үүнээс хойш түүний талаар бараг мэдээлэл гараагүй бөгөөд 2022 оны арваннэгдүгээр сард тив алгасах баллистик пуужингийн туршилтын үеэр аавтайгаа хамт ил гарч ирснээр дахин анхаарал татсан юм.
Тэдний мэдээлснээр Ким Жү Ае морь унах, цанаар гулгах, усанд сэлэх дуртай бөгөөд Пхеньян хотод гэрээр боловсрол эзэмшиж байгаа аж. 2024 оны нэгдүгээр сар гэхэд Өмнөд Солонгосын тагнуулын байгууллага түүнийг Ким Жон Уны дараагийн залгамжлагч гэсэн дүгнэлтэд хүрсэн. Гэхдээ түүний эцэг залуу хэвээр байгаа зэрэг олон хувьсагч хүчин зүйлс нөлөөлж болзошгүйг мөн онцолсон байна. Түүнээс хойш Ким Жү Ае аавынхаа хамт олон нийтийн өмнө тогтмол гарч ирэх болсон. Тэрээр тив алгасах баллистик пуужингийн туршилт болон цэргийн жагсаалын үеэр эцгийнхээ хажууд зогсож, ахлах цэргийн командлагчдаас хүндэтгэлийн ёсолгоо хүртэх болсон нь анхаарал татаж байна.
2025 оны есдүгээр сард түүнийг Умард Солонгосоос гадна олон улсын айлчлалын үеэр анх удаа харсан тохиолдол болсон юм. 1948 оноос хойш Умард Солонгосыг удирдаж ирсэн Кимийн гэр бүл өөрсдийгөө “ариун удмынхан” хэмээн үздэг бөгөөд зөвхөн тэд л улсыг удирдах эрхтэй гэж үздэг. Гэсэн хэдий ч эмэгтэй хүнээр хэзээ ч удирдуулж байгаагүй, гүн патриарх уламжлалтай энэ улсад хүйсийн талаарх хандлагыг зөөлрүүлэх зорилгоор Ким Жон Ун охиноо энэ үед олонд танилцуулж байгаа байж магадгүй гэсэн таамаг ч бий.
Эх сурвалж: BBC
СЭТГЭГДЭЛ БИЧИХ