ОХУ ба Вьетнам улс “Ниньтхуан-1” атомын цахилгаан станцыг барих тухай засгийн газар хоорондын хэлэлцээрт гарын үсэг зурсан тухай “Росатом” мэдээллээ.
Гарын үсэг зурах ёслолд ОХУ-ын Ерөнхий сайд Михаил Мишустин, Вьетнамын Ерөнхий сайд Фам Минь Тинь болон “Росатом” корпорацийн тэргүүн Алексей Лихачев, Вьетнамын засгийн газрын хэрэг эрхлэх газрын дарга Чан Ван Шон оролцсон байна.
“Энэ бол зөвхөн хоёр блок барих тухай асуудал биш юм. Энэ нь эрчим хүчний салбарт удаан хугацаанд түншлэх эхлэлийг тавьж байгаа бөгөөд Вьетнамын эрчим хүчний бие даасан байдлыг бэхжүүлж, эдийн засгийн өсөлтийн шинэ боломжуудыг олгоно” гэж А.Лихачев онцлон тэмдэглэлээ.
Хэлэлцээрийн дагуу ВВЭР-1200 реакторуудаар тоноглогдсон, нийт 2400Мвт-ын хүчин чадалтай хоёр блокийг барих бөгөөд зураг төсөл нь Ленинградын АЦС-2-ынхтой ижил юм.
Вьетнамд АЦС барих төлөвлөгөөг анх 2010 онд боловсруулсан боловч 2016 онд цуцалсан байна. Харин “Росатом” корпорац төслийг хэрэгжүүлэхэд оролцохоо мэдэгдсэний дараа 2024 оны 11 дүгээр сард Вьетнамын тал төслийг сэргээхээр шийдвэрлэжээ.
Энэ удаагийн засгийн газар хоорондын хэлэлцээрийг өнгөрсөн оны сүүлчээр байгуулахаар төлөвлөж байсан боловч гарын үсэг зурах товыг хэдэн сараар хойшлуулжээ.
СЭТГЭГДЭЛ БИЧИХ