Жижиг, дунд бизнес эрхлэгчдийг дэмжих, өрхийн бизнесийг дараагийн шатанд гарган стартап хэлбэрт шилжүүлэхэд чиглэсэн "Бизнес эрхлэгчдийн форум-2026" үйл ажиллагаа амжилттай боллоо.
Тус форумыг Төрийн банкны Бизнес инкубатор төв болон МУИС-ийн Шинжлэх ухаан технологийн Улаанбаатар парктай хамтран хоёр дахь жилдээ зохион байгуулсан юм. Энэ жилийн форум “ӨРХИЙН БИЗНЕСЭЭС СТАРТАП РУУ” уриан дор болж, орчин үеийн бизнесийн хөгжлийн чиг хандлага, инновац, дижитал шилжилт, санхүүжилтийн боломжуудыг онцлон танилцуулжээ.
Форумд 120 гаруй жижиг, дунд бизнес эрхлэгчид, их сургуулийн багш, судлаачид, оюутнууд болон гарааны бизнес эхлүүлэх сонирхолтой багууд идэвхтэй оролцсон нь стартапын хөгжил, санхүүжилтийн хүртээмжийн хэрэгцээ өндөр байгааг харуулж байгааг зохион байгуулагчид нь тодотгож байна.
Форумын хүрээнд бизнесийн автоматжуулалт, санхүүгийн шийдлүүд, хөрөнгө оруулалт татах стратеги, хиймэл оюун ухааныг бизнесийн үйл ажиллагаанд нэвтрүүлэх зэрэг сэдвээр илтгэл, хэлэлцүүлгүүд өрнүүлж, оролцогчдод практик мэдлэг, хэрэгжүүлэх боломжтой шийдлүүдийг хүргэжээ. Мөн амжилттай бизнес эрхлэгчдийн туршлага, түгээмэл тулгардаг алдаа, бэрхшээлийг даван туулах арга замуудыг хуваалцсан нь форумын ач холбогдлыг нэмэгдүүллээ хэмээн МУИС-иас мэдээллээ.
Энэхүү форумаар “Өрхийн бизнесээс стартап” модуль сургалтыг албан ёсоор нээж, цаашид бизнес эрхлэгчдийг шат дараатайгаар хөгжүүлэх сургалт, хөтөлбөрүүдийг хэрэгжүүлэх эхлэлийг тавьсан байна.
СЭТГЭГДЭЛ БИЧИХ