Вьетнамын Ерөнхий сайд Фам Минь Чинь ням гарагт Орос улсад албан ёсны айлчлал хийхээр мордлоо. Энэхүү айлчлалын үеэр хоёр улс газрын тос, байгалийн хий зэрэг эрчим хүчний салбарын хамтын ажиллагааны хэд хэдэн гэрээнд гарын үсэг зурахаар төлөвлөж байгаа талаар эх сурвалж мэдэгдэв.
Ням гарагаас лхагва гараг хүртэл үргэлжлэх уг айлчлал нь дэлхийн хэмжээнд Ойрх Дорнод дахь дайнаас үүдэлтэй түлшний нийлүүлэлтийн доголдол нэмэгдэж буй энэ үед Вьетнам шатахууны нөөцөө бэхжүүлэх зорилготой юм.
Айлчлалын хүрээнд хоёр орны харилцааг гүнзгийрүүлэх, худалдаа, хөрөнгө оруулалт, эрчим хүчний салбар дахь хамтын ажиллагааг өргөжүүлэхэд анхаарах аж. Ханойн мэдэгдэлд дурдсанаар, энэ үеэр цөмийн цахилгаан станцын төслүүд, мөн эрчим хүч, газрын тос, хийн салбарын хамтын ажиллагаатай холбоотой чухал гэрээнүүдийг байгуулах юм.
Түүнчлэн газрын тос, хийн салбарын хамтын ажиллагааг худалдаа, хайгуул, олборлолт, хүний нөөцийн бэлтгэл зэрэг бүх чиглэлд бэхжүүлэхээр төлөвлөжээ.
АНУ болон Израиль Ираны эсрэг дайны ажиллагааг хоёрдугаар сарын сүүлээр эхлүүлснээс хойш дэлхий даяар түлшний үнэ өсөж, хомсдол үүсэх эрсдэл нэмэгдсэн. Үүний улмаас Вьетнамд АИ-95 бензиний үнэ 50 хувь, дизель түлшний үнэ 70 хувиар тус тус өсөөд байна.
Ерөнхий сайд Фам Минь Чинь саяхан Катар, Кувейт, Алжир, Япон зэрэг орнуудаас түлшний дэмжлэг хүссэн утсаар яриа хийжээ.
Айлчлалын үеэр тэрбээр ОХУ-ын Ерөнхий сайд Михаил Мишустин-тай даваа гарагт уулзахаар төлөвлөсөн байна. Талууд Орос-Вьетнамын худалдааны асуудлууд болон эрчим хүч зэрэг салбар дахь хамтарсан төслүүдийг хэрэгжүүлэх талаар хэлэлцэх юм.
ОХУ-ын Ерөнхий сайд Михаил Мишустин 2025 оны нэгдүгээр сард Ханойд айлчлах үеэр Орос улс Вьетнамд үндэсний цөмийн эрчим хүчний салбар байгуулахад оролцоход бэлэн гэдгээ илэрхийлж байсан. Мөн хоёр улс тухайн үед цөмийн эрчим хүчний салбарт хамтран ажиллах гэрээ байгуулж, Вьетнам ойрын таван жилийн хугацаанд цөмийн цахилгаан станц барихаар зорьж байгаагаа мэдэгдэж байжээ.
СЭТГЭГДЭЛ БИЧИХ