Ерөнхий сайд Гомбожавын Занданшатарын захирамжаар байгуулагдсан төрийг хохиролгүй болгох үүрэг бүхий ажлын хэсэг бодит үр дүнд хүрч, нийт 120 тэрбум төгрөгийн өр төлбөрийг барагдуулжээ.
Тус ажлын хэсгийг Төрийн өмчийн бодлого зохицуулалтын газрын дарга Б.Цэнгэл ахалж, холбогдох төрийн байгууллагуудын хамтарсан бүрэлдэхүүнтэйгээр ажиллаж байгаа.
Ажлын хэсэг санхүүгийн эрсдэлд орсон, татан буугдсан банканд байршиж байсан улсын хөрөнгийг буцаан төвлөрүүлэх, өр төлбөрт шилжүүлэн авсан үл хөдлөх хөрөнгийг эдийн засгийн эргэлтэд оруулах, бодит үнэлгээг тогтоох зэрэг арга хэмжээг шат дараатай хэрэгжүүлжээ.
Үүний үр дүнд өр төлбөрт тооцож авсан хөрөнгийг нээлттэй дуудлага худалдаагаар борлуулах, зарим барилга байгууламжийг нийгмийн салбарын хэрэгцээнд ашиглах шийдвэрүүд бодит ажил болж, улсын төсөвт төвлөрөх орлогыг нэмэгдүүлж, төрд учирсан хохирлыг нөхөн барагдуулахад чухал ахиц гарсан байна.
Мөн цаашид ижил төрлийн өр төлбөр, царцсан хөрөнгийг эдийн засгийн эргэлтэд оруулах ажлыг эрчимжүүлэхээр төлөвлөж байгааг албаныхан онцоллоо.
СЭТГЭГДЭЛ БИЧИХ