Энэ оны нэгдүгээр сард Гренланд руу илгээгдсэн Данийн цэргүүд АНУ-ын Ерөнхийлөгч Дональд Трамп Арктикийн аралд довтолж магадгүй гэсэн болгоомжлолын улмаас гол нисэх буудлуудын зурвасуудыг дэлбэлэхэд бэлэн байсан гэж Данийн олон нийтийн DR телевиз мэдээлжээ.
Данийн засгийн газар, цэргийн эх сурвалжууд болон Европын холбоотнуудын мэдээлэлд тулгуурлан DR суваг мөн мөргөлдөөн гарсан тохиолдолд шархадсан хүмүүсийг эмчлэх зорилгоор цусны нөөц хүртэл авчирсан гэж мэдээлсэн байна. Үүнийг Financial Times сонин ч баталжээ. Харин Данийн Батлан хамгаалах яам энэ талаар “тайлбар өгөхгүй” гэсэн байна.
Нэрээ нууцалсан Данийн өндөр албан тушаалын эх сурвалж BBC-д хэлэхдээ “аюулгүй байдлын үүднээс маш цөөн хүн л энэ ажиллагааг мэдэж байсан” гэжээ.
АНУ болон Дани хоёр хоёулаа НАТО-гийн гишүүн боловч Данийн хагас автономит бүс болох Гренландын асуудал Вашингтон болон Европын холбоотнуудын хооронд гүнзгий зөрчил үүсгээд байна.
Трамп хоёр дахь бүрэн эрхийн хугацаандаа Гренландыг өөртөө нэгтгэх хүсэлтэй байгаагаа удаа дараа илэрхийлж байсан ч Гренландын удирдлага болон Дани улс үүнийг олон удаа няцаажээ.
DR нийтлэлдээ Данийн засгийн газар, цэргийн дээд түвшний 12 эх сурвалж болон Франц, Германы холбоотнуудын мэдээлэлд тулгуурласан гэж дурдсан байна. Тэдний хэлснээр Копенгаген, Парис, Берлин болон Нордикийн орнуудаас улс төрийн дэмжлэг хүсэж, Европын эв нэгдлийг харуулах, Гренландад хамтарсан цэргийн ажиллагааг нэмэгдүүлэхийг зорьжээ.
Гэвч нөхцөл байдал нэгдүгээр сарын 3-нд АНУ-ын тусгай хүч Венесуэлийн Ерөнхийлөгч Николас Мадурог Каракас хотод гэнэтийн ажиллагаагаар баривчилсны дараа хурцадсан байна.
Данийн аюулгүй байдлын өндөр албан тушаалтан “Трамп Гренландыг авахыг хүсэж байгаагаа байнга хэлж, дээрээс нь Венесуэлд болсон явдалтай нийлээд бид бүх хувилбарыг нухацтай авч үзэхээс өөр аргагүй болсон” гэжээ.
СЭТГЭГДЭЛ БИЧИХ