Эрүүл мэндийн сайд Ж.Чинбүрэнгийн мэдээлснээр улаанбурханы өвчлөл нэмэгдсэнтэй холбогдуулан Засгийн газрын нөөц хөрөнгөөс 5.5 тэрбум төгрөг гарган, шаардлагатай арга хэмжээг авч хэрэгжүүлснээр улаанбурханы өвчлөлийг тодорхой хэмжээнд бууруулж чадсан байна. Гэсэн хэдий ч дархлаажуулалтын хамрагдалт хангалтгүй хэвээр байгаа бөгөөд вакцинд хамрагдаагүй хүүхдүүд нийт өвчлөгсдийн 70 хувийг эзэлж байгаа нь анхаарал татаж байна. Иймд эцэг, эхчүүд хүүхдүүдээ товлолын дагуу дархлаажуулалтад бүрэн хамруулах, иргэд амны хаалт зүүх, гараа тогтмол угаах зэрэг урьдчилан сэргийлэх арга хэмжээг чанд сахихыг албаныхан уриаллаа.
Засгийн газрын 2026 оны хоёрдугаар сарын 11-ний өдрийн хуралдаанаар CDC буюу Өвчний хяналт, сэргийлэлтийн үндэсний төв байгуулах шийдвэр гарсан талаар Эрүүл мэндийн сайд Ж.Чинбүрэн мэдээллээ. Тэрбээр энэхүү шийдвэр нь өвчнөөс урьдчилан сэргийлэхэд чиглэсэн нийгмийн эрүүл мэндийн тусламж үйлчилгээний тогтолцоог Монгол Улсад бүрэн нэвтрүүлэх түүхэн алхам болсныг онцолсон юм. Мөн Эрүүл мэндийн даатгалаас ямар тусламж, үйлчилгээ авсан талаарх мэдээллээ E-Mongolia системээр дамжуулан харах боломжтой болсон байна. Иргэн өөрийн болон хүүхдийнхээ мэдээллээр E-Mongolia-д нэвтэрч, “Эрүүл мэндийн даатгал” цэсийг сонгосноор даатгалаар үнэ төлбөргүй авсан тусламж, үйлчилгээний дэлгэрэнгүй мэдээлэлтэй танилцах боломжтой юм байна. Уг E-Mongolia системийн шинэчлэлийг хамтран хийсэн ЦХИХХ-ын сайд Э.Батшугарт талархал илэрхийллээ.
СЭТГЭГДЭЛ БИЧИХ