Amazon компани энэ жил хиймэл оюун ухаан, робот хөгжүүлэлтэд 200 тэрбум ам.доллар зарцуулахаар төлөвлөж байгаагаа зарлалаа. Энэ нь AI-ийн дэлхийн өрсөлдөөнд технологийн аваргууд хөрөнгө оруулалтаа улам эрчимжүүлж буйн ээлжит жишээ болов. Энэхүү мэдэгдэл нь Amazon-ийн үүсгэн байгуулагч Жефф Безосын эзэмшлийн Washington Post сонин ажилтнуудынхаа гуравны нэгийг цомхотгоно гэж зарласнаас ердөө нэг хоногийн дараа гарч ирсэн нь олны анхаарлыг татаж байна.
Amazon 2025 оны санхүүгийн жилийн дөрөвдүгээр улиралд 213.4 тэрбум ам.долларын орлого олсон ч ашиг нь Уолл Стрийтийн таамгаас ялимгүй доогуур гарчээ. Гэсэн ч компанийн орлого өмнөх оныхоос 14 хувиар өссөн байна. Цэвэр ашиг 21.2 тэрбум ам.долларт хүрч, нэгж хувьцаанд ногдох ашиг 1.95 ам.доллар болсон нь өмнөх оны мөн үеэс өссөн үзүүлэлт юм.
Гүйцэтгэх захирал Энди Жэссигийн мэдэгдсэнээр, Amazon энэ онд хөрөнгө оруулалтын зардлаа 125 тэрбумаас 200 тэрбум ам.доллар болгон нэмэгдүүлэхээр төлөвлөж байна. Энэ нь шинжээчдийн таамаглаж байсан хэмжээнээс хавьгүй өндөр дүн юм. Тус хөрөнгө оруулалт нь AI, чип, робот, нам орбитын хиймэл дагуулын технологи зэрэг салбарт чиглэнэ. Amazon-ийн үүлэн тооцооллын үйлчилгээ болох AWS-ийн орлого 24 хувиар өсөж, 35.6 тэрбум ам.долларт хүрсэн нь сүүлийн 13 улирал дахь хамгийн хурдан өсөлт байлаа. Мөн сурталчилгааны орлого 22 хувиар нэмэгджээ. Харин орлогын тайлан хүлээлтээс доогуур гарсны дараа Amazon-ийн хувьцаа арилжааны дараах зах зээл дээр бараг 9 хувиар унасан байна. Үүний улмаас Жефф Безосын хөрөнгө 9 тэрбум ам.доллароор багассан ч түүний нийт хөрөнгө 235 тэрбум ам.доллароор хэмжигдэж байна. Мөн “Washington Post”-ын ерөнхий редактор асан, 11 удаагийн Пулитцерийн шагналт Мартин Барон “Ж.Безосын энэхүү шийдвэр тус сонины ирээдүйн зорилгыг сулруулж цаашид уншигчид цөөрөх эрсдэл бий” хэмээн болгоомжилжээ.
СЭТГЭГДЭЛ БИЧИХ