Куба даяар цахилгаан эрчим хүч тасарсны улмаас тус улсын нийт хүн ам буюу 10 орчим сая хэрэглэгч тог цахилгаангүй болсон тухай цахилгаан шугам сүлжээний UNE оператор компани өчигдөр мэдээлжээ.
Эрчим хүчний хангамжийг сэргээх арга хэмжээ авч байна гэж тус компанийн Х нийгмийн сүлжээн дэх хуудсанд бичсэн байна. Харин Ройтерс агентлагийн мэдээлснээр, энэ удаагийн блэкаут буюу орон даяар тог тасрахаас өмнө хэдэн хоногийн турш олон цагаар цахилгаан тасалж байжээ.
АНУ-ын эрх баригчид Кубад нефть нийлүүлэхийг хориглосны улмаас тус улсад эдийн засаг, эрчим хүчний гүнзгий хямрал нүүрлэсэн байна. Тус улсад газрын тосоор ажилладаг хуучирсан технологи бүхий цахилгаан станцууд байдаг. Саяхныг хүртэл Кубад нефть нийлүүлдэг гол улс байсан Венесуэл рүү АНУ довтолж, ерөнхийлөгч Н.Мадурог баривчлан авч явснаас хойш Венесуэл улс нийлүүлэлтээ зогсоосон юм. Ройтерсийн мэдээнд дурдсанаар, он гарснаас хойш Кубын боомтуудад ердөө хоёрхон жижиг танкер ирсэн байна. Нэг нь нэгдүгээр сард Мексикээс нефть, нөгөө нь хоёрдугаар сард Ямайкаас шингэрүүлсэн хий ачиж иржээ.Үүнтэй холбоотойгоор Кубад нефть нийлүүлэхээр завдсан улс орнуудад өндөр татвар ногдуулна гэж Вашингтон сүрдүүлсэн байна.
Үүний хариуд Кубын Ерөнхийлөгч Мигель Диас-Канель хэлэхдээ, АНУ-ын энэ бүслэн хаалт бол геноцид хийхэд чиглэсэн фашист үйлдэл гэжээ. Харин 13-ны өдөр тэрбээр мэдэгдэхдээ, АНУ-тай хэлэлцээ хийж эхэлсэн гэлээ.
Мөн Кубын засгийн газрын шадар сайд Оскар Перес-Олива өчигдөр телевизийн NBC News сувагт ярилцлага өгөхдөө “Куба улс АНУ-ын компаниуд болон АНУ-д амьдардаг кубачуудтай худалдааны уян хатан харилцаа тогтооход бэлэн байна” гэжээ.
СЭТГЭГДЭЛ БИЧИХ