Австралийн сөрөг хүчний удирдагч, Либерал намыг тэргүүлсэн анхны эмэгтэй Сюзан Лэй намынхаа Батлан хамгаалахын сүүдрийн сайд албан тушаалаасаа огцорсны дараа удирдлагын сорилттой тулгараад байна. Ангус Тейлор пүрэв гарагт намын даргад нэр дэвшихээ албан ёсоор мэдэгдэж, улс орон “хүнд байдалд орсон”, мөн Либерал нам “зам мөрөө алдсан” хэмээн мэдэгдэв.
Сюзан Лэй өнгөрсөн жил нам нь түүхэн дэх хамгийн муу сонгуулийн ялагдлыг амссаны дараах удирдлагын өрсөлдөөнд Тейлорыг ялимгүй саналаар ялсан юм. Гэвч түүнээс хойш түүний рейтинг сул хэвээр байж, консерватив чиг баримжаатай Либерал-Үндэсний эвслийн доторх зөрчил тэмцэл нэмэгдсээр иржээ.
1940-өөд оноос эхтэй уг эвсэл Лэйгийн удирдлагын хугацаанд хоёр ч удаа салж, дахин нэгдсэн нь түүний байр суурийг улам сулруулсан байна. Намын доторх консерватив жигүүрт харьяалагддаг Тейлор лхагва гарагт намын удирдлагын багаас гарч байгаагаа зарласан. “Бид муу ажиллаж буй Лейборист засгийн газрыг хангалттай хяналтандаа байлгаж чадсангүй” гэж тэр сэтгүүлчдэд хэлээд, нам “австраличуудын амьдралын хэв маягийг хамгаалж”, “амьжиргааны түвшинг сэргээхэд анхаарах” ёстой гэжээ. Эвсэл Лейбор намд хүнд ялагдал хүлээсний шалтгааны талаар нэгдсэн байр сууринд хүрч чадаагүй хэвээр байна. Тус сонгуулиар Либерал нам томоохон хотуудад бараг бүрэн шахагдсан юм. Сонгуулийн дараа уур амьсгал, эрчим хүчний бодлогын талаар маргалдсаны улмаас эвсэл түр хугацаанд салсан бөгөөд 2050 он гэхэд нүүрстөрөгчийн ялгарлыг тэглэх бодлогыг дэмжих эсэх дээр санал зөрөлдсөн байна. Дараа нь Либерал нам Үндэсний нам болон өөрийн баруун жигүүрийн шахалтаар уг бодлогоос татгалзахаар тохиролцжээ.
Эх сурвалж: BBC
СЭТГЭГДЭЛ БИЧИХ