ОХУ-ын Хууль зүйн яам баасан гарагт ЗХУ-ын удирдагч Никита Хрущевийн зээ охин Нина Хрушеваг “гадаадын агент” хэмээн бүртгэжээ. Түүнийг Украинд өрнөж буй дайныг эсэргүүцэж, Оросын талаар “худал мэдээлэл” тараасан гэж буруутгасан байна.
62 настай Нина Хрушчёва нь Орос-Америкийн эрдэмтэн, зохиолч бөгөөд 1991 оноос хойш АНУ-д амьдарч байгаа. Тэрээр Нью-Йорк хот дахь The New School их сургуулийн Олон улсын харилцааны профессор юм. Түүний ээж Юлия нь 1953-1964 онд Зөвлөлт Холбоот Улсыг удирдаж, Сталины үеийн бодлогыг зөөлрүүлэх “де-сталинизаци” хөтөлбөрийг эхлүүлсэн Никита Хрушевийн ач охин байв.
The Moscow Times сонин энэ асуудлаар Нина Хрушчёватай холбогдож тайлбар авахыг оролдсон байна.
ОХУ 2012 онд “гадаадын агент” гэсэн шошгыг нэвтрүүлснээс хойш олон зуун соёлын зүтгэлтэн, сэтгүүлч, бизнес эрхлэгчид, мөн хэвлэл мэдээллийн байгууллагуудыг ийм ангилалд оруулжээ.
Оросын эрх баригчид уг ангиллыг төрийн дайсан гэж үзсэн хувь хүн, байгууллагад хэрэглэдэг. “Гадаадын агент” гэж бүртгэгдсэн хүмүүс олон нийтийн өмнө хэлэх үг, мэдэгдэл болон сошиал сүлжээнд нийтлэх бүх мэдээлэлдээ урт тайлбар, анхааруулгыг заавал хавсаргах шаардлагатай болдог байна.
СЭТГЭГДЭЛ БИЧИХ