"Оюу Толгой" төслийн хувь нийлүүлэгчдийн зээлийн хүүг бууруулах асуудлаар Сангийн сайд Б.Жавхлан “Рио Тинто” группийн төлөөлөгчидтэй уулзаж, хэлэлцээг үргэлжлүүлэв.
Энэ үеэр, Монгол Улсын Засгийн газраас дэвшүүлж буй “Оюу толгой” ХХК-ийн төлж буй хувь нийлүүлэгчдийн зээлийн хүүг бууруулах боломжийн талаар санал солилцжээ. Монгол Улсын зээлжих зэрэглэлийн өнөөгийн нөхцөл байдал, түүхий эдийн зах зээлийн төлөв, мөн төслийн хэрэгжилтийн үе шат зэрэг хүчин зүйлстэй уялдуулан зээлийн хүүг бууруулах боломжийг ийн талууд хэлэлцсэн байна.
Мөн зээлийн хүүгийн одоогийн нөхцөл, төслийн санхүүгийн бүтэц, эрсдэлийн үнэлгээ, ирээдүйн мөнгөн урсгалтай холбоотой байр суурь, үндэслэлээ харилцан танилцуулж, нээлттэй хэлэлцэх нь зээлийн хүүг бууруулах бодит шийдэлд хүрэхэд чухал ач холбогдолтой гэдэгт санал нэгдэв. Түүнчлэн дахин уулзаж, Оюу толгой төслийн хувь нийлүүлэгчдийн зээлийн хүүг бууруулах асуудлаарх хэлэлцээг үргэлжлүүлэх аж.
СЭТГЭГДЭЛ БИЧИХ