Хүндийг өргөлтийн Азийн аварга шалгаруулах тэмцээн Энэтхэгийн Гандинагар хотод тавдугаар сарын 12-17-нд болно.
Тус тэмцээнд манай улсаас үндэсний шигшээ багийн дасгалжуулагч Ч.Мартын удирдлагад дөрвөн тамирчин оролцохоор бэлтгэлээ базааж байна. Тодруулбал, эмэгтэйчүүдийн 63 кг-д олон улсын хэмжээний мастер Б.Хонгорзул, +86 кг-д дэд мастер Г.Чинболор, эрэгтэйчүүдийн 79 кг-д спортын мастер И.Амарсанаа, 88 кг-д У.Мөнхбаяр өрсөлдөх аж. Түүнчлэн олон улсын II зэрэглэлийн шүүгч О.Баярцэцэг, Б.Гантулга, Монголын хүндийг өргөлтийн холбооны ерөнхий нарийн бичгийн дарга, олимпын зэрэглэлийн шүүгч О.Одгэрэл нар ажиллах аж.
Манай баг Азийн аварга шалгаруулах тэмцээний бэлтгэлийг олон улсын хэмжээний мастер Б.Энхжин, Л.Болортуяа, Б.Хонгорзул, дэд мастер Г.Чинболор, спортын мастер И.Амарсанаа, У.Мөнхбаяр, О.Оюунжаргал, Б.Отгонтуул гэсэн бүрэлдэхүүнтэй Архангай аймгийн “АРА арена”-д хийж байна.
Ташрамд дурдахад, Хүндийг өргөлтийн ААШТ-ийг тавдугаар сарын 1-нд зохион байгуулах ёстой байсан ч Ойрх Дорнод болон Персийн булангийн бүс нутагт үүсээд буй нөхцөл байдлын улмаас тэмцээний хугацааг хойшлуулах шийдвэрийг Азийн хүндийг өргөлтийн холбооноос гаргажээ.
СЭТГЭГДЭЛ БИЧИХ