БНХАУ гуравдугаар сарын эхээр бензин, дизель зэрэг боловсруулсан түлшний экспортыг түр хугацаанд зогсоох шийдвэр гаргасан нь дэлхийн эрчим хүчний зах зээлд анхаарал татсан үйл явдал болж байна. Тус улсын засгийн газар томоохон нефть боловсруулах үйлдвэрүүдэд шинэ экспортын гэрээ байгуулахыг зогсоох, өмнө нь тохиролцсон зарим нийлүүлэлтийг цуцлах чиглэл өгсөн тухай олон улсын хэвлэлүүд мэдээлжээ.
Энэхүү шийдвэр нь Ойрх Дорнодод өрнөж буй мөргөлдөөнөөс шалтгаалан түүхий нефтийн нийлүүлэлт тасалдах эрсдэл нэмэгдсэнтэй холбоотой юм. Персийн булан дахь нөхцөл байдал хурцдаж, дэлхийн нефтийн нийлүүлэлтийн гол зам болох Ормузын хоолойн тээвэрт саатал үүссэн нь Азийн орнуудын эрчим хүчний аюулгүй байдалд дарамт учруулж эхэлжээ.
Бээжингийн эрх баригчид дотоодын түлшний нөөцөө хамгаалж, зах зээлд үнийн огцом өсөлт үүсэхээс сэргийлэх зорилгоор ийм арга хэмжээ авч байгаа гэж шинжээчид үзэж байна. Хятад улс түлшний экспортоо квотын системээр зохицуулдаг бөгөөд дотоодын хэрэгцээ, нийлүүлэлтийн тэнцвэрийг хадгалах нь бодлогын гол зорилт болдог.
Гэсэн хэдий ч энэ шийдвэр нь Азийн бүс нутгийн түлшний нийлүүлэлтэд шууд нөлөөлөх эрсдэлтэй. Хятад бол бүс нутгийн хамгийн том түлш экспортлогчдын нэг тул экспорт буурах нь дизель, шатахууны үнэ өсөхөд хүргэж болзошгүй гэж салбарын шинжээчид анхааруулж байна.
Мэдээллээс үзвэл гуравдугаар сарын экспортын ихэнх ачаа өмнө нь баталгаажсан тул богино хугацаанд томоохон өөрчлөлт гарахгүй ч дөрөвдүгээр сараас эхлэн Хятадын түлшний гадагш чиглэсэн нийлүүлэлт мэдэгдэхүйц буурах төлөвтэй байна. Энэ нь дэлхийн эрчим хүчний зах зээлд шинэ дарамт үүсгэж, нефть боловсруулах ашигт ажиллагааг нэмэгдүүлэх магадлалтай гэж шинжээчид дүгнэжээ.
СЭТГЭГДЭЛ БИЧИХ