АНУ болон Ираны хооронд өрнөж буй зэвсэгт мөргөлдөөний эхний өдрүүдэд асар их хэмжээний санхүүгийн зардал гарсан талаар АНУ-ын Батлан хамгаалах яам Конгресст мэдээлжээ. Тодруулбал, дайны эхний зургаан хоногийн хугацаанд АНУ дор хаяж 11.3 тэрбум ам.доллар зарцуулсан гэж Пентагоны албаныхан сенаторуудад хаалттай танилцуулгын үеэр мэдэгдсэн байна.
Энэхүү зардлын ихэнх хэсгийг пуужин, бөмбөг, агаарын довтолгоонд ашигласан өндөр үнэтэй зэвсэглэл болон Иранаас ирж буй пуужин, дроныг сөнөөх хамгаалалтын системүүдэд зарцуулсан гэж мэдээлжээ. Тухайлбал дайны эхний хоёрхон хоногт л 5.6 тэрбум ам.долларын зэвсэглэл ашиглагдсан гэсэн тооцоо гарсан байна.
Шинжээчдийн тооцоогоор дайны өдөр тутмын зардал ойролцоогоор 890 саяас 1 тэрбум ам.доллар хүрч болзошгүй гэж үзэж байна.
Мөн Ираны хямд өртөгтэй дрон, пуужинг устгахын тулд АНУ олон сая ам.долларын үнэтэй “Patriot” болон “THAAD” системийн пуужин ашиглаж байгаа нь зардлыг огцом өсгөж буй гол шалтгаан гэж судлаачид тайлбарлажээ.
Дайн үргэлжилбэл АНУ-ын зардал хэдэн арван тэрбум ам.долларт хүрэх эрсдэлтэй бөгөөд Конгрессоос нэмэлт санхүүжилт хүсэх шаардлага гарч болзошгүй талаар Вашингтоны албаныхан анхааруулж байна.
Үүний зэрэгцээ мөргөлдөөн дэлхийн нефтийн зах зээл, агаарын тээвэр, аялал жуулчлал болон олон улсын худалдаанд томоохон нөлөө үзүүлж эхэлжээ.
СЭТГЭГДЭЛ БИЧИХ