Авлигалтай тэмцэх газрын Олон нийтийн зөвлөлөөс УИХ-ын гишүүд ёс зүй болон хууль зүйн ноцтой зөрчил гаргасан тохиолдолд бүрэн эрхийг нь хугацаанаас нь өмнө дуусгавар болгох эрх зүйн зохицуулалтыг бүрдүүлж, хариуцлага тооцох боломжийг бий болгох шаардлагатай гэж үзэж байна. Үүнтэй холбоотой хуулийн төслийг Улсын Их Хурлаар хэлэлцэн батлах нь зүйтэй хэмээн тус зөвлөлөөс мэдэгджээ.
Тэдний хэлснээр, сүүлийн үед төрд итгэх иргэдийн итгэл буурах хандлага ажиглагдаж байна. Үүнийг зарим УИХ-ын гишүүн тангаргаасаа няцаж, Үндсэн хууль зөрчих, сонгогчдод өгсөн амлалтаасаа буцах, ёс зүйн хэм хэмжээг зөрчих зэрэг үйлдэлтэй холбон тайлбарлаж байна.
Иймээс хариуцлагатай, ёс зүйтэй парламент бүрдүүлэх нь зөвхөн төрийн байгууллагын үүрэг бус, иргэн бүрийн оролцоонд тулгуурлах ёстойг онцолжээ. Энэ хүрээнд УИХ-ын цахим өргөдөл, гомдлын petition.parliament.mn системд холбогдох өргөдлийг санаачлан байршуулж, иргэдийг дэмжиж санал өгөхийг уриалсан байна.
Түүнчлэн энэ сарын 16-нд төв талбайд иргэдээс санал авч, гарын үсэг цуглуулахаар төлөвлөжээ. Энэ нь иргэд өөрсдийн сонгосон төрдөө хяналт тавих, хариуцлага нэхэх, шударга төрийг шаардах боломж гэж үзэж байгаа аж.
СЭТГЭГДЭЛ БИЧИХ