Ормузын хоолой хаагдсан энэ үед дэлхийн нөөцөөс 400 сая баррель нефть гаргахаар төлөвлөж байгаагийн зэрэгцээ Иран улсаас анхааруулга гаргалаа.
Ираны Исламын хувьсгалт гвардийн корпус мэдэгдэхдээ Персийн булангийн стратегийн чухал усан зам болох Ормузын хоолойгоор “нэг литр ч газрын тос нэвтрүүлэхгүй” гэж мэдэгдэв. Энэ нь АНУ-Израил Ираны эсрэг хийж буй дайны үеэр дэлхийн эрчим хүчний зах зээлийг улам донсолголоо.
Исламын хувьсгалт гвардийн корпусийн Хатам аль-Анбия командлалын төвийн хэвлэлийн төлөөлөгч “АНУ, Израил эсвэл тэдний холбоотнуудтай холбоотой ямар ч хөлөг онгоцыг хууль ёсны бай гэж үзнэ” гэжээ. Мөн “Та нар нефтийн үнийг хиймлээр буулгаж чадахгүй. Нефтийн үнэ баррель нь 200 ам.доллар хүрнэ гэж хүлээ. Нефтийн үнэ бүс нутгийн аюулгүй байдлаас хамаардаг. Харин бүс нутгийн аюулгүй байдлыг алдагдуулж буй гол эх сурвалж нь та нар” гэлээ.
Энэ долоо хоногт дэлхийн нефтийн үнэ их хэлбэлзэж байна. Учир нь АНУ болон Израил Ираны эсрэг довтолгоогоо үргэлжлүүлж, харин Иран Ойрхи Дорнод даяар пуужин болон дроноор хариу довтолж байна.
Дэлхийн нефтийн нийлүүлэлтийн ойролцоогоор 1/5 нь дамжин өнгөрдөг Ормузын хоолой хаагдсанаас гадна Персийн булангийн зарим оронд олборлолт удааширсан нь нийлүүлэлтийн тасалдлын талаар ноцтой болгоомжлол үүсгэжээ. Мөн хоёрдугаар сарын 28-нд эхэлсэн дайн удахгүй дуусах шинжгүй байгаа нь тодорхойгүй байдлыг улам нэмэгдүүлж, нефтийн үнийг өсгөж байна.
Мөн газрын тосны үнэ 200 ам.доллар хүрэхэд бэлд гэж тус улс дэлхий нийтэд мэдэгдсэн байна. Үүнтэй зэрэгцэн Олон улсын эрчим хүчний агентлагийн гишүүн орнууд их хэмжээний газрын тос нөөцөөсөө гаргах болжээ.
АНУ-ын WTI маркийн газрын тосны фьючерс 5.51 хувиар нэмэгдэж баррель нь 92.22 ам.доллароор арилжиж байна. Харин Брент маркийн газрын тосны фьючерс 5.88 хувиар нэмэгдэж баррель нь 97.39 ам.доллароор арилжиж байгаа юм.
СЭТГЭГДЭЛ БИЧИХ