Ойрхи Дорнодод өрнөж буй дайн бүс нутгийн аялал жуулчлалын салбарт өдөр бүр ойролцоогоор 600 сая ам.долларын жуулчны зардлын алдагдал учруулж байна гэж дэлхийн аялал жуулчлалын салбарын байгууллага тооцоолжээ.
АНУ болон Израилийн довтолгооны дараа Тегеран Персийн булангийн хэд хэдэн улс руу цохилт өгснөөр бүс нутагт нислэгүүд цуцлагдах, агаарын орон зай хаагдах, мөн аялах гэж байсан хүмүүсийн болгоомжлол нэмэгдэх зэрэг хүчин зүйлс аялал жуулчлалын эдийн засагт хүчтэй цохилт өгч эхэлсэн байна.
Дэлхийн Аялал Жуулчлал, Аяллын Зөвлөлийн (WTTC) ерөнхийлөгч Глория Гевара “Хэдхэн хоногийн тасалдал ч бүс нутгийн аялал жуулчлалын чиглэлүүд, бизнесүүд болон ажилчдад маш хурдан хугацаанд их хэмжээний эдийн засгийн алдагдал авчирдаг” гэж мэдэгдсэн байна.
Аялагчид аяллаа олноор нь цуцалж эхэлжээ. Зөвхөн Дубай хотод гуравдугаар сарын 6-нд дууссан долоо хоногийн хугацаанд 80 мянга гаруй богино хугацааны байрны захиалга цуцлагдсан байна. Энэ нь Airbnb, Vrbo зэрэг платформын мэдээллийг нэгтгэсэн AirDNA судалгаанд дурджээ.
Мөргөлдөөн эхлэхээс өмнө WTTC байгууллага энэ онд олон улсын жуулчид Ойрх Дорнодод 207 тэрбум ам.доллар зарцуулна гэж тооцоолж байсан юм.
Дубай зэрэг хотууд тансаг үйлчилгээ, жилийн турш дулаан уур амьсгал, харьцангуй тайван орчноороо жуулчдыг татаж ирсэн. Гэвч дайн тансаг зочид буудлуудыг хүртэл тойрсонгүй.
Ойрхи Дорнодын томоохон нислэгийн төвүүд болох Абу Даби, Дубай, Доха, Бахрейн хотууд өдөр бүр ихэвчлэн 500 мянгаас дээш зорчигч хүлээн авдаг. Гэвч тав хоног үргэлжилсэн нислэгийн цуцлалтын улмаас өнгөрсөн долоо хоногт 4 сая орчим зорчигч гацсан гэж судалгааны байгууллага мэдээлжээ.
Өнгөрсөн долоо хоногт бүс нутгийн нисэх буудлуудаас олон зуун нислэг үйлдэж, гацсан арван мянган жуулчдыг буцаах ажиллагаа явагдсан байна.
Дубай өнгөрсөн долоо хоногт нислэгээ дахин эхлүүлж, пүрэв гараг гэхэд нислэгийнхээ ойролцоогоор дөрөвний нэгийг сэргээжээ. Харин Катар амралтын өдрүүдэд агаарын орон зайгаа нээсэн ч ням гарагт дахин хаасан бөгөөд мягмар гарагт зөвхөн тусгай зөвшөөрөлтэй цөөн нислэг үйлдсэн байна.
Гэсэн хэдий ч Ойрх Дорнодын аялал жуулчлалын чиглэлүүд өмнө нь ч мөргөлдөөний дараа хурдан сэргэж байсан түүхтэй. Жишээлбэл, өнгөрсөн есдүгээр сард Израиль Дохад цохилт өгсний дараа Катар дахь зочид буудлуудын орлогын үзүүлэлт огцом буурсан ч нэг сарын дотор дахин өсөлтөд орсон аж.
СЭТГЭГДЭЛ БИЧИХ