Нийслэлийн Онцгой байдлын газраас нийслэл, дүүргийн нутгийн захиргааны байгууллагын удирдлага, албан хаагчдад зориулсан гамшгаас хамгаалах сургалт, дадлагыг үе шаттайгаар зохион байгуулж байна. Энэ хүрээнд өнөөдөр Баянгол, Сүхбаатар, Чингэлтэй дүүргийн нутгийн захиргааны байгууллагын 100 гаруй удирдлага, ажилтан, албан хаагч сургалтад хамрагдлаа. Сургалтаар гамшгаас хамгаалах бэлэн байдал, төлөвлөлт, хариу арга хэмжээний зохион байгуулалт, гамшгийн эрсдэлийн үнэлгээ хийх арга зүй, байгууллагын галын аюулгүй байдал, газар хөдлөлтийн талаарх ойлголтыг олгож байна. Мөн дадлага сургуулиар дамжуулан гамшгийн үед ажиллах ур чадвар, аюулгүй байдлаа хангах дадлыг нэмэгдүүлэхэд чиглэж байна.
Гамшгаас хамгаалах сургалтыг танхимын болон дадлагын гэсэн хоёр үе шаттайгаар зохион байгуулна. Танхимын сургалтыг гуравдугаар сарын 16-нд Баянзүрх, Хан-Уул, Сонгинохайрхан дүүргүүдэд, гуравдугаар сарын 20-нд Багахангай, Багануур, Налайх дүүргүүдэд зохион байгуулах юм. Харин дадлага сургалтыг Онцгой байдлын ерөнхий газрын дэргэдэх Гамшгаас хамгаалах сургалтын төв, 116 дугаар ангийг түшиглэн гуравдугаар сарын 21-нээс дөрөвдүгээр сарын 2-ны өдрүүдэд зохион байгуулна.
СЭТГЭГДЭЛ БИЧИХ