Канадын Британ Колумб мужийн нам гүм, цөөн хүн амтай Тамблер Риж хотод болсон аймшигт буудалцаан улс орон даяар цочрол төрүүлээд байна. Сургууль болон ойролцоох орон сууцанд гарсан халдлагын улмаас есөн хүн амиа алдаж, 25 хүн шархадсан нь Канадын орчин үеийн түүхэн дэх хамгийн олон хохирол дагуулсан халдлагуудын нэгд тооцогдож байна.
Цагдаагийн байгууллагын мэдээлснээр халдлага мягмар гарагт Тамблер Рижийн дунд сургуульд эхэлжээ. Сургуулийн байранд зургаан хүн газар дээрээ амиа алдаж, долоо дахь хохирогч эмнэлэг рүү хүргэгдэх замдаа нас барсан байна. Мөн сэжигтний цогцос сургуулийн дотор олдсон бөгөөд халдлагыг үйлдсэн этгээд өөрийн амийг егүүтгэсэн гэж үзэж байгаа аж. Ойролцоох нэгэн орон сууцнаас дахин хоёр хүний цогцос илэрсэн нь уг хэрэгтэй холбоотой гэж цагдаа нар мэдээлэв.
Сургуулийн 12 дугаар ангийн сурагч Дариан Куист CBC Radio West-д ярилцлага өгөхдөө тухайн үеийн нөхцөл байдлыг ийнхүү дурджээ. Тэрээр орон нутгийн цагаар 13:30-д хичээлдээ ирсний дараахан хонгилд дохиолол дуугарч, анги танхимын хаалгыг түгжиж, хөл хорионы горимд шилжих заавар өгсөн гэнэ. Эхэндээ энгийн дадлагын дохио байх гэж бодсон ч удалгүй нөхцөл байдал ноцтойг ойлгожээ. “Бид ширээнүүдээ чирж авчраад хаалгаа хааж, бэхэлсэн. Цагдаа нарыг иртэл хоёр гаруй цаг ангидаа бүслэгдсэн байдалтай байсан” хэмээн тэр ярьсан байна. Түүний хэлснээр сурагчид гар утсаараа хэргийн газрын зургуудыг харж, айдаст автсан ч тайван байхыг хичээж байжээ.
Британ Колумб мужийн Олон нийтийн аюулгүй байдал, Хууль зүйн сайд Нина Кригер цагдаа нар дуудлага хүлээн авснаас хойш хоёр минутын дотор сургууль дээр очсон гэж мэдэгдэв. Тэрээр “Энэ бол нягт холбоотой жижигхэн хот. Шуурхай арга хэмжээ авсан нь эргэлзээгүй олон хүний амийг аварсан” хэмээн онцолж, үүргээ нэр төртэй биелүүлсэн алба хаагчдад талархал илэрхийлсэн байна. Мөн энэхүү “сүйрлийн үйл явдал” нь зөвхөн хот төдийгүй бүх муж даяар цочрол, уй гашуу авчирсныг дурджээ.
Канадын Ерөнхий сайд Марк Карни энэхүү халдлагад “гүнээ эмгэнэж” буйгаа илэрхийлж, Мюнхений Аюулгүй байдлын бага хуралд оролцохоор төлөвлөсөн Германд хийх айлчлалаа цуцалжээ. Түүний ажлын албанаас мэдээлснээр засгийн газар Британ Колумбын иргэдтэй хамт энэхүү аймшигт эмгэнэлт явдлыг даван туулахад анхаарч ажиллана гэжээ.
СЭТГЭГДЭЛ БИЧИХ