Австрали улс насанд хүрэгчдийн контент бүхий вэбсайт болон хүчирхийлэлийг сурталчлах эрсдэлтэй видео тоглоомд нэвтрэхэд заавал нас баталгаажуулах шинэ журам хэрэгжүүлж эхэллээ. Даваа гарагаас эхлэн Австралийн хэрэглэгчид “насанд хүрэгчдийн” ангилалд багтах сайт, тоглоом ашиглахын тулд насны баталгаажуулалт хийх шаардлагатай болж байна.
Энэ нь тус улс 16-аас доош насныханд томоохон сошиал сүлжээнүүдийг ашиглахыг хориглосон дэлхийд анхдагч шийдвэр гаргаснаас хэдхэн сарын дараа хэрэгжиж буй шинэ арга хэмжээ юм.
Шинэ дүрмийн дагуу хайлтын системүүд, сошиал медиа платформууд, аппликейшн дэлгүүрүүд, тоглоомын үйлчилгээ үзүүлэгчид болон хиймэл оюун ухааны системүүд хүүхдүүдийг насанд нь тохироогүй контентээс хамгаалахын тулд “бодитой арга хэмжээ” авах үүрэгтэй болжээ.
Энэхүү шинэ журам нь хүүхдүүдийг хүчирхийлэл, өөрийгөө гэмтээх, амиа хорлохтой холбоотой мэдээлэл зэрэг аюултай онлайн контентээс хамгаалах зорилготой гэж албаныхан тайлбарлажээ.
Австрали улс өмнө нь мөн хамгийн том сошиал сүлжээнүүд болох TikTok, YouTube, Instagram, Facebook болон X (Twitter)-ийг 16-аас доош насныханд ашиглуулахгүй байх хатуу хязгаарлалт тогтоосон. Хэрэв платформууд энэ журмыг зөрчвөл 49.5 сая австрали доллар хүртэл торгууль ногдуулах боломжтой.
Австралийн Онлайн аюулгүй байдлын комиссар Жули Инман Грантын хэлснээр, Австралийн ангиллын зөвлөлөөс R18+ гэж үнэлэгдсэн онлайн тоглоомд нэвтрэхийн тулд хэрэглэгчид заавал насны баталгаажуулалт хийх шаардлагатай болно. Харин бусад тоглоомд нас шалгах шаардлага тавихгүй аж.
Шинэ журам хэрэгжсэнээр “Grand Theft Auto V” зэрэг тоглоомын онлайн горим 16-аас доош насныханд ашиглах боломжгүй болох магадлалтай байна.
Жули Инман Грант “Бид хүүхдүүдийг баар, архины дэлгүүр, казино, насанд хүрэгчдийн дэлгүүрт чөлөөтэй оруулахгүй. Гэтэл тэдний ихэнх цагийг өнгөрүүлдэг онлайн орчинд ийм хамгаалалт бараг байдаггүй байсан. Одоо энэ байдал өөрчлөгдөнө” гэж мэдэгдсэн байна.
Үүний зэрэгцээ Канадын Aylo компанийн эзэмшдэг порнографийн сайтууд Австралийн хэрэглэгчдийн хандалтыг хязгаарлаж эхэлжээ. Тухайлбал RedTube болон YouPorn сайтууд Австралиас хандах боломжгүй болсон бол Pornhub сайтад ил тод контентгүй хувилбарыг харуулж байгаа аж. Эдгээр сайтууд “Танай бүсэд шинэ бүртгэл одоогоор хүлээн авахгүй” гэсэн мэдэгдэл байршуулжээ.
Гэсэн хэдий ч зарим шинжээч энэ журам нь хэрэглэгчдийн хувийн нууцад эрсдэл учруулж болзошгүй гэж анхааруулж байна.
Баруун Сиднейн их сургуулийн дижитал орчны судлаач Жоанн Орландогийн хэлснээр, сошиал медиа төдийгүй насанд хүрэгчдийн сайтууд дээр төрийн үнэмлэх эсвэл нүүр таних скан шаардах нь хэрэглэгчдийн мэдрэмтгий мэдээлэл хэнд хүрэх вэ гэсэн ноцтой асуулт үүсгэж байна гэжээ.
Мөн зарим шинжээч хүүхдүүдийг хориглосон контент руу улам татах эрсдэлтэй гэж үзэж байна. Сиднейн их сургуулийн дижитал соёлын тэнхимын ахлах багш Марк Жонсон “Залуус хүссэн тоглоомоо тоглохын тулд насны шалгалтыг тойрч гарах арга үргэлж олдог. Хэт хориглох нь харин ч сонирхлыг нь нэмэгдүүлж болзошгүй” гэж анхааруулжээ.
Шинэ журам хэрэгжиж эхэлснээс хойш Австралид VPN ашиглалт огцом өссөн байна. Өнгөрсөн долоо хоногт VPN аппликейшнүүдийн таталт эрс нэмэгдэж, “Super Unlimited Proxy” аппликейшн Австралийн iPhone-ийн үнэгүй аппуудын жагсаалтад 40-д байсан бол долоо хоногийн дотор 7-р байрт оржээ. Мөн Nord VPN, Proton VPN зэрэг аппликейшнүүдийн таталт ч мэдэгдэхүйц өссөн гэж аппликейшний дата шинжилгээний Sensor Tower компани мэдээлсэн байна.
СЭТГЭГДЭЛ БИЧИХ