Монгол Улсад эмэгтэй, эрэгтэй хүмүүсийн нийгэм, эдийн засгийн үзүүлэлтүүдэд тодорхой ялгаа ажиглагддаг бөгөөд статистик мэдээллүүдээс харахад эмэгтэйчүүдийн дундаж наслалт илүү урт байгаа бол эрэгтэйчүүдийн нас баралтын түвшин өндөр хэвээр байна.
Үндэсний статистикийн байгууллагын мэдээллээр Монгол эмэгтэйчүүдийн дундаж наслалт 77.1 жил байгаа бол эрэгтэйчүүдийнх 67.9 жил буюу эмэгтэйчүүд дунджаар ес орчим жилээр урт насалж байна. Хүн амын бүтцийн хувьд нийт хүн амын 51 орчим хувийг эмэгтэйчүүд, 49 орчим хувийг эрэгтэйчүүд эзэлдэг байна.
Төрөлтийн бүтэц ч мөн адил бага зэргийн ялгаатай байдаг. Сүүлийн жилүүдийн статистикаас харахад Монголд төрж буй нийт хүүхдийн ойролцоогоор 51 хувь нь хүү, 48–49 хувь нь охин байдаг аж.
Хөдөлмөрийн зах зээлийн үзүүлэлтүүдэд мөн хүйсийн ялгаа ажиглагддаг. Дундаж цалингийн хэмжээгээр эрэгтэйчүүдийн дундаж цалин эмэгтэйчүүдийнхээс өндөр байгаа бөгөөд эрэгтэйчүүдийн дундаж цалин ойролцоогоор 3 сая төгрөг, эмэгтэйчүүдийнх 2.5 сая төгрөгийн түвшинд байна. Гэсэн хэдий ч байгууллагын удирдах албан тушаалд ажиллагчдын 41 орчим хувийг эмэгтэйчүүд эзэлж байгаа нь эмэгтэйчүүдийн оролцоо нэмэгдэж байгааг харуулж байна.
Нөгөө талаас Монгол Улсад нас баралтын нийт тохиолдлын 60 гаруй хувийг эрэгтэйчүүд эзэлдэг бөгөөд энэ нь эрэгтэйчүүдийн дундаж наслалт харьцангуй бага байгаатай холбоотой гэж судлаачид үздэг байна. Ийнхүү хүн амын бүтэц, хөдөлмөр эрхлэлт, нийгмийн үзүүлэлтүүдэд эмэгтэй, эрэгтэй хүмүүсийн хооронд тодорхой ялгаа ажиглагдсаар байна.
СЭТГЭГДЭЛ БИЧИХ