Монгол Улсын Гадаад харилцааны сайд Б.Батцэцэг Норвеги Улсын Ослогийн их сургуулийн харьяа Соёлын түүхийн музейд зочилж, Норвегийн нэрт аялагч Оскар Мамены өв сангаас бүрдсэн Монгол Улсын түүхэн цаг үетэй холбоотой гэрэл зургийн үзэсгэлэнгийн нээлтэд оролцлоо. 20 дугаар зууны эхэн үед манай улсад амьдарч, ажиллаж байсан Оскар Мамен нь Өргөө хотод байх хугацаандаа Монголын түүхэнд онцгой байр суурь эзлэх үйл явдлуудыг гэрэл зургийн хальснаа мөнхлөн үлдээсэн юм. Тухайлбал, 1911 оны Үндэсний эрх чөлөөний хувьсгал, VIII Богд Жавзандамба хутагтыг шашин, төрийн тэргүүнээр өргөмжилсөн түүхэн мөчүүдийг түүний авсан гэрэл зургууд тод томруун өгүүлдэг.
Оскар Мамен тухайн үеийн Өргөө хотын архитектур, хийд сүм, орд өргөө, худалдааны зах, гудамж талбай, хотын өдөр тутмын амьдрал, мөн Консулын дэнжид байрлаж байсан гадаадын пүүс, байгууллагуудыг гэрэл зурагнаа буулган үлдээсэн нь өдгөө түүх, соёлын судалгаанд үнэлж баршгүй эх сурвалж болж байгааг эрдэмтэн судлаачид онцолдог.
Соёлын түүхийн музей түүний үлдээсэн 3000 орчим гэрэл зургийн хальсыг сэргээн хэвлэж, цахимжуулан хадгалж байна. Мөн 130 гаруй эд өлгийн зүйлээс бүрдсэн цуглуулга, түүнчлэн хараахан сэргээгдээгүй, олон нийтэд дэлгэгдээгүй олон мянган гэрэл зургийн хальс тус музейд хадгалагдаж буй юм. Энэхүү үнэт өвийг нягт нямбай хадгалж, судлан хамгаалж, ирээдүй хойч үед өвлүүлэн үлдээж буй Соёлын түүхийн музейн хамт олон, судлаачид болон Оскар Мамены ач, зээ нарт талархалаа илэрхийллээ.
СЭТГЭГДЭЛ БИЧИХ