Техасаас Вашингтон хот хүртэл ойролцоогоор 3,200 км замыг заримдаа хөл нүцгэн, заримдаа цасан дундуур туулсан Буддын лам нарын 108 өдрийн “Энхийн алхалт” мягмар гарагт албан ёсоор өндөрлөлөө.
Дөрвөн сарын турш үргэлжилсэн энэхүү хүнд сорилттой аялал АНУ-д улс төрийн хуваагдал хурцадсан энэ үед олон сая хүний анхаарлыг татаж, сошиал орчинд өргөн тархсан байна. Аяны турш лам нар оюун төвлөрөл, бясалгалын үнэ цэнийг түгээжээ. Тэдний удирдагч,
Хүндэт Бхикху Паннакара “Энэ алхалт дуусахад бидэнтэй уулзсан хүмүүс бясалгалаа үргэлжлүүлж, дотоод амар амгаланг олно гэж найдаж байна” хэмээн хэлсэн байна.
Тэдний аялал 2025 оны аравдугаар сарын 26-нд Техасын Форт Уорт хот дахь Huong Dao Vipassana Bhavana төвөөс эхэлжээ. АНУ-ын нийслэлд хүрэлцэн ирснийхээ дараа лам нар Вашингтоны Үндэсний сүмд зочилж, олон шашны хамтарсан мөргөлд оролцсон байна. Мөн долоо хоногийн сүүлээр Абрахам Линкольны дурсгалын цогцолбор болон АНУ-ын Конгрессын ордны талбайд байрлах Энхийн хөшөөнд очихоор төлөвлөжээ.
Сонирхуулахад, Аялалд дэлхийн янз бүрийн орнуудын Тхеравада урсгалын хийдүүдээс ирсэн 19 лам оролцсон байна. Тэд АНУ-ыг гаталсан бүх хугацаандаа нэг эгнээнд, алхам алхмаар урагшилжээ. Буддын шашинд 108 тоо нь сүнслэг төгсгөлийг илэрхийлдэг ариун бэлгэдэлтэй тоо юм. Арваннэгдүгээр сард Техасын Хьюстон хотын ойролцоо хурдны зам дагуу алхаж явах үед тэднийг дагалдаж явсан хамгаалалтын машин ачааны машинд мөргүүлж, хоёр лам бэртжээ. Тэдний нэгийн хөлийг тайрах шаардлагатай болсон байна.
Лам нар Техас руугаа буцахдаа автобусаар зорчих бөгөөд бямба гарагт Форт Уорт хотод хүрэлцэн ирэхээр төлөвлөжээ. Буцах зам нь тэдний 108 өдрийн алхалтаас хавьгүй хурдан, хялбар байх нь гарцаагүй.
Эх сурвалж: BBC
СЭТГЭГДЭЛ БИЧИХ