АНУ-ын Ерөнхийлөгч Дональд Трамп Канад, АНУ-ыг холбох стратегийн ач холбогдол бүхий 4.6 тэрбум ам.долларын өртөгтэй “Горди Хоу” олон улсын гүүрийн талаар шүүмжлэлтэй мэдэгдэл хийж, төслийг “хаах”-аар сүрдүүлсэн нь хоёр улсын харилцаанд шинэ маргаан дэгдээлээ. Үүнд Канадын тал “эерэг” яриа хэлэлцээ хийснээ мэдэгдэж, нөхцөл байдлыг намжаахыг зорьж байна.
Трамп даваа гарагт сошиал сүлжээндээ урт мэдэгдэл нийтэлж, Онтариогийн Виндзор хот болон Мичиганы Детройтыг холбох уг гүүр “бараг АНУ-ын оролцоогүй” баригдсан хэмээн ташаа мэдээлэл тараасан. Тэрбээр Канад гүүрийн хоёр үзүүрийг бүхэлд нь эзэмшдэг, АНУ ямар ч ашиг хүртэхгүй хэмээн бичсэнээс гадна Канад, Хятадын худалдаа нэмэгдвэл “Канадчуудыг мөсөн хоккей тоглохыг хориглож, Стэнлийн цомыг бүрмөсөн устгана” гэх мэт хачирхалтай мэдэгдэл хийсэн юм.Трамп мөн гүүрийн төслийг баталсан өмнөх Ерөнхийлөгч Барак Обамаг “зөрчилтэй шийдвэр” гаргасан хэмээн буруутгасан байна.
Харин Канадын Ерөнхий сайд Марк Карни мягмар гарагт сэтгүүлчдэд хандан, уг асуудлаар Трамптай “эерэг” яриа өрнүүлсэн гэж мэдэгдэв. Тэрбээр франц хэлээр өгсөн ярилцлагадаа “нөхцөл байдал шийдэгдэнэ” гэдгийг онцолжээ. Карни “Гүүрийн барилгын зардлыг Канадын тал бүрэн хариуцсан. Харин өмчлөл нь Мичиган муж болон Канадын Засгийн газар хооронд хамтарсан хэлбэртэй. Барилгын ажилд Канадын ган, ажилчид оролцсон ч АНУ-ын ган, ажилчид мөн адил хувь нэмрээ оруулсан. Энэ бол хоёр улсын хамтын ажиллагааны тод жишээ” хэмээн тайлбарласан байна.
Бүгд Найрамдах намын гишүүн асан Жефф Уотсон Трампад хандан “Таны анхны бүрэн эрхийн хугацаанд барилгын ажил ид өрнөж байсан. Тухайн үед та гүүрийг яаравчлан барихыг уриалж байсныг санах хэрэгтэй” хэмээн сануулжээ. Мөн сүүлийн үед Трамп Канадын эсрэг тарифыг эрс нэмэгдүүлж, ган, хөнгөн цагаан, автомашинд татвар ногдуулсан. Үүний хариуд Канадын хамгийн олон хүн амтай Онтарио муж АНУ-ын архи, согтууруулах ундааг төрийн өмчит дэлгүүрүүдийнхээ лангуунаас хассан билээ. 2026 оны эхээр ашиглалтад орохоор төлөвлөсөн “Горди Хоу” олон улсын гүүр нь Канад, АНУ-ын эдийн засгийн хамтын ажиллагааны бэлгэдэл төдийгүй, Хойд Америкийн худалдааны чухал зангилаа юм. Трампын мэдэгдэл богино хугацаанд улс төрийн маргаан дэгдээсэн ч хоёр талын албан ёсны байр суурь хамтын ажиллагааг үргэлжлүүлэхэд чиглэж буйг илтгэж байна. Эцэст нь, гүүр бол хоёр орныг салгах бус, холбох зорилготой бүтээн байгуулалт гэдгийг энэ маргаан дахин санууллаа.
СЭТГЭГДЭЛ БИЧИХ