АНУ, Израилийн Ираны эсрэг дайн Ойрхи Дорнодын нийлүүлэлтэд саад учруулснаар нефтийн үнэ Лхагва гарагт 1%-иар өссөн байна. Гэвч АНУ-ын Ерөнхийлөгч Доналд Трамп Ормузын хоолойгоор хөлөг онгоцуудыг АНУ-ын Тэнгисийн цэрэг хамгаалан гаргах боломжтой гэж мэдэгдсэний дараа өсөлтийн хурд өмнөх өдрүүдээс саарсан байна.
Брент маркийн нефтийн үнэ 1.17 ам.доллар буюу 1.4%-иар өсөж, баррель нь 82.57 ам.долларт хүрсэн нь Мягмар гарагт 2025 оны нэгдүгээр сараас хойших хамгийн өндөр хаалтын ханшид хүрсний дараах үзүүлэлт юм.
АНУ-ын (WTI) нефтийн үнэ 72 цент буюу 1%-иар өсөж, баррель нь 75.28 ам.доллар болсон байна. Энэ нь зургаадугаар сараас хойших хамгийн өндөр хаалтын ханшид хүрсний дараах өсөлт юм.
Сүүлийн хоёр арилжааны өдөрт хоёр төрлийн нефтийн үнэ нийтдээ 5% ба түүнээс дээш өссөн байна.
Phillip Nova компанийн ахлах шинжээч Приянка Сачдева “Одоогийн байдлаар геополитикийн нөхцөл байдал нь нөөцийн мэдээлэл, АНУ-ын эдийн засгийн үзүүлэлт, ОПЕК-ийн мэдэгдэл зэрэг уламжлалт үнийн хүчин зүйлсээс илүү нөлөө үзүүлж байна” гэжээ.
Тэрээр ойрын хугацаанд Персийн булангаас гарах бодит экспортын мэдээлэл, батлагдсан танкерын халдлагууд, АНУ-ын тэнгисийн цэргийн хөдөлгөөн, Ираны байр суурийг анхаарах нь чухал гэдгийг онцолсон байна. Израиль болон АНУ-ын хүчнийхэн Мягмар гарагт Иран даяар цохилт өгсөн бөгөөд үүний хариуд Иран дэлхийн нефтийн үйлдвэрлэлийн бараг гуравны нэгийг бүрдүүлдэг бүс нутгийн эрчим хүчний дэд бүтцэд цохилт өгчээ.
Хэрэв экспорт сэргэхгүй бол ойрын өдрүүдэд өдөрт бараг 3 сая баррель олборлолтоо бүрэн зогсоох шаардлагатай болж магадгүй аж.
Мөн Иран Ормузын хоолойгоор дамжин өнгөрөх танкеруудад цохилт өгсөн байна. Тус хоолойгоор дэлхийн нефть болон шингэрүүлсэн хийн нийлүүлэлтийн ойролцоогоор тавны нэг нь дамждаг. Одоогоор хоолойн хөдөлгөөн үндсэндээ хаалттай хэвээр байна.
Доналд Трамп хэрэв шаардлагатай бол АНУ-ын Тэнгисийн цэрэг танкеруудыг хамгаалан дагалдах боломжтой гэж мэдэгдсэн бөгөөд АНУ-ын Олон улсын хөгжлийн санхүүжилтийн корпорацид Персийн булан дахь далайн худалдаанд улс төрийн эрсдэлийн даатгал, санхүүгийн баталгаа олгох үүрэг өгсөн гэжээ.
ING банкны шинжээчид “Даатгалын компаниуд Ормузын хоолойгоор дамжин өнгөрөх хөлөг онгоцны дайны эрсдэлийн даатгалыг цуцалж байгаа энэ үед ийм баталгаа амласан нь сайшаалтай. Гэхдээ энэ нь шууд хэрэгжихгүй. Тэнгисийн цэргийн хамгаалалт тустай ч мөн цаг хугацаа шаардлагатай” гэж тэмдэглэжээ.
Улс орнууд болон компаниуд өөр маршрут, өөр нийлүүлэлт хайж эхэлсэн байна. Энэтхэг болон Индонез улс өөр эрчим хүчний эх үүсвэр хайж байгаагаа мэдэгдсэн бол зарим Хятадын нефть боловсруулах үйлдвэрүүд үйл ажиллагаагаа зогсоох эсвэл засвар үйлчилгээний хуваариа урагшлуулжээ.
АНУ-д өнгөрсөн долоо хоногт түүхий нефтийн нөөц 5.6 сая баррелиар өссөн тухай зах зээлийн эх сурвалжууд American Petroleum Institute-ийн мэдээллээс иш татан дурдсан байна. Энэ нь шинжээчдийн таамаглаж байсан 2.3 сая баррелиас хавьгүй өндөр үзүүлэлт юм. АНУ-ын Засгийн газрын албан ёсны тоо баримт Лхагва гарагт гарахаар хүлээгдэж байна.
СЭТГЭГДЭЛ БИЧИХ