2026 оны Хятадын Цагаан сарын баярыг угтсан аяллын их нүүдэл энэ жил түүхэн дээд хэмжээнд хүрч, нийт 9.5 тэрбум удаагийн бүс нутаг дамнасан зорчих хөдөлгөөн бүртгэгдэхээр байна. Албан ёсны энэ тоо нь зөвхөн дэлхийн хамгийн том жил тутмын хүн амын шилжилт хөдөлгөөн болохыг дахин нотлоод зогсохгүй, Хятадын эдийн засгийн идэвх, хэрэглэгчдийн итгэл сэргэж буйг илтгэх чухал дохио хэмээн шинжээчид дүгнэж байна. Энэ тухай Үндэсний хөгжил, шинэчлэлийн хороо мэдээлсэн байна.
540 сая зорчилт галт тэргээр
95 сая нь агаарын тээврээр
Үлдсэн нь авто замаар хийгдэх юм
Энэ жилийн тэмдэглэлт өдөр 2-р сарын 2-ноос 3-р сарын 13 хүртэл, нийт 40 хоног үргэлжилнэ. Энэ хугацаа нь албан ёсны 9 хоногийн Цагаан сарын амралтаас урт бөгөөд улс даяар ажил хөдөлмөр эрхэлж буй иргэд төрөлх нутагтаа буцаж, гэр бүлтэйгээ золгодог онцгой үе юм.
Тээврийн салбарын бэлэн байдал
Аяллын их нүүдлийн гол тулгуур болсон иргэний нисэх болон төмөр замын салбарын эрэлт огцом өсөхийг тооцоолж, урьдчилсан зохион байгуулалтаа эрчимжүүлжээ.
China Southern Airlines 40 хоногийн хугацаанд 126,000 гаруй зорчигч тээврийн нислэг үйлдэхээр төлөвлөж, 260 гаруй чиглэлд 13,000 нэмэлт нислэг оруулахаар болсон байна.
China Eastern Airlines чүньюний үеэр 822 онгоц, түүний дотор дотоодын C919 загварын 14 онгоц ашиглан 125,000 орчим нислэг гүйцэтгэхээр болжээ. Иргэний нисэхийн салбарт өдөрт дунджаар 19,400 нислэг хийгдэх төлөвтэй байгаа нь өмнөх оноос 5 хувиар өссөн үзүүлэлт юм. Харин төмөр замын салбарт оргил ачааллын өдрүүдэд 14,000 гаруй зорчигчийн галт тэрэг зэрэг хөдөлгөөнд орж, суудлын багтаамж жилийн өмнөхөөс 5.3 хувиар нэмэгдсэн байна.
Урт амралт, уян хатан ажлын зохицуулалт нь дотоодын аялал жуулчлалыг шинэ түвшинд хүргэх хандлагатай байгааг зах зээлийн өгөгдлүүд харуулж байна.
Хятадын аяллын томоохон платформ Fliggy-ийн мэдээлснээр:
Цагаан сарын амралтын үеийн зочид буудлын захиалга 71 хувиар өссөн
Амралтын дунд үеийн онгоцны тийзийн захиалга 55 хувиар нэмэгдсэн
Машин түрээс 97%,
Хөтөчтэй аяллын үйлчилгээ 111%-иар тус тус өсжээ.
2026 оны Цагаан сарын аяллын их нүүдэл бол зүгээр нэг баярын хөдөлгөөн бус, Хятадын эдийн засгийн амьд сэргэлт, үйлчилгээний салбарын өсөлт, хэрэглэгчдийн итгэлийн бодит тусгал юм. 9.5 тэрбум зорчилт нь дэлхийн түүхэнд байгаагүй хэмжээний үзэгдэл хэвээр үлдэхийн зэрэгцээ, Хятадын эдийн засаг шинэ ондоо идэвхтэй, тогтвортой эхлэл хийж буйг илтгэж байна.
Эх сурвалж: Global Times
СЭТГЭГДЭЛ БИЧИХ