АНУ болон Ираны хооронд өрнөж буй зэвсэгт мөргөлдөөний үеэр амь үрэгдсэн анхны америк цэргүүд ням гарагийн өглөө Кувейтийн иргэний боомтод байрлаж байсан түр ажиллагааны төв рүү Ираны шууд цохилт өгсний улмаас амиа алдсан талаар CNN агентлаг эх сурвалжид тулгуурлан мэдээлжээ.
Кувейтийн Шуаиба боомтод болсон уг халдлагын улмаас амиа алдсан цэргүүдийн тоо зургаа болж нэмэгдсэн тухай АНУ-ын Төв командлал (CENTCOM) даваа гарагийн үдээс хойш мэдэгдсэн байна. Анх гурван цэрэг амь үрэгдсэн гэж мэдээлж байсан ч барилгын үлдэгдлээс сураггүй байсан хоёр цэргийн шарилыг олсноор тоо өсжээ.
АНУ-ын Батлан хамгаалахын сайд Пит Хегсет халдлагад өртсөн байгууламж нь “хамгаалалттай тактикийн ажиллагааны төв” байсан бөгөөд агаарын довтолгооноос хамгаалах системийг нэвтэлсэн “нэг” сум туссан гэж мэдэгдсэн. Өмнө нь CNN уг халдлагыг дроноор үйлдсэн байж болзошгүй гэж мэдээлж байсан юм.
Эх сурвалжийн мэдээлснээр халдлага орон нутгийн цагаар өглөөний 09:00 цагийн орчимд гэнэтийн байдлаар болсон бөгөөд ямар нэгэн урьдчилсан анхааруулга, дохиолол дуугараагүй байна. Цохилт гурван чиргүүл нийлүүлж байгуулсан, дотороо оффисын өрөө бүхий түр төвийн яг гол хэсэгт оногджээ. Дэлбэрэлтийн дараа барилгын хана гадагш дэлбэрч, дотор тал нь харлан шатсан байдалтай байсан бөгөөд хэдэн цагийн дараа ч гал бүрэн унтраагүй байжээ.
Ням гарагийн өглөө авсан хиймэл дагуулын зургаар боомтын нэгэн барилга шатаж, тэнгэр өөд өтгөн хар утаа суунаглаж буй нь харагдсан байна.
АНУ-ын Төв командлалын мэдэгдэлд уг байгууламж нь “Ираны анхны довтолгооны үеэр” өртсөн гэж дурдсан ч амь үрэгдсэн цэргүүдийн нэрийг ар гэрийнхэнд нь мэдэгдэж дуусах хүртэл олон нийтэд зарлаагүй байна.
Амиа алдсан цэргүүд Кентакки мужийн Форт Нокс баазад байрладаг 1-р Театрын хангалтын командлалын бүрэлдэхүүнд харьяалагдаж байсан бөгөөд өөр анги нэгтгэлүүдээс есөн сарын хугацаатай ээлжийн дэмжлэгээр томилогдон ажиллаж байжээ.
Эдгээр зургаан цэрэг нь Бямба гарагийн өглөө (Зүүн эргийн цагаар) эхэлсэн “Operation Epic Fury” нэртэй Ираны эсрэг цэргийн ажиллагааны хүрээнд амь үрэгдсэн анхны хохирогчид болж байна. Батлан хамгаалахын сайд Пит Хегсет болон Ерөнхийлөгч Дональд Трамп нар цаашид хохирол нэмэгдэх магадлалтайг анхааруулжээ. Төв командлалын төлөөлөгчийн мэдээлснээр одоогоор нийт 18 цэрэг хүнд шархадсан байна.
АНУ-ын Зэвсэгт хүчний Штабын дарга нарын нэгдсэн хорооны дарга генерал Дэн Кэйн даваа гарагт сэтгүүлчдэд мэдээлэл өгөхдөө амь үрэгдсэн цэргүүдийг “манай улсын хамгийн шилдэг хөвгүүд” хэмээн тодорхойлсон байна.
СЭТГЭГДЭЛ БИЧИХ