Израиль Иран руу цохилт өгсний дараа Газа руу орох бүх хилийн боомтыг тодорхойгүй хугацаагаар хааж, 2 сая орчим хүнийг дахин өлсгөлөнгийн ноцтой хямралд хүргэх аюул нүүрлээд байна. Хоёр жил гаруйн турш үргэлжилсэн дайны дараа, Израилийн цэрэг Газын нутаг дэвсгэрийн ойролцоогоор 60 хувийг хяналтдаа байлгаж байгаа бөгөөд тус бүс нутгийн хүнсний бараг бүх хэрэгцээг гаднаас нийлүүлдэг аж.
Хүмүүнлэгийн байгууллагуудын мэдээлснээр, бямба гарагт дайн эхлэх үед нөөцөлсөн хүнс хэдхэн хоногийн л хүрэлцээтэй үлдсэн байна.
WCK байгууллагын онцолж буйгаар “Хэрэв хилийн боомтууд хаалттай хэвээр байвал энэ долоо хоногт хүнсгүй болно” хэмээн тус байгууллагын үүсгэн байгуулагч, тэргүүн Хосе Андрес сошиал сүлжээнд бичжээ.“Бид өдөр бүр 1 сая халуун хоол бэлтгэж байна. Бидэнд өдөр бүр хүнсний нийлүүлэлт шаардлагатай.”
Эмзэг бүлгийн иргэдийг хангадаг нийтийн талх нарийн боовны газруудад ойролцоогоор 10 хоногийн гурил үлдсэн бол хүмүүнлэгийн тусламжийн хүнсний багц хоёр долоо хоног орчим хүрэлцэх нөөцтэй аж. Өнгөрсөн хавар Израиль Газад бүрэн бүслэлт тогтоож, дараа нь хүнсний тээвэрлэлтийг маш хатуу хязгаарласан. Үүний улмаас өнгөрсөн зун өлсгөлөн нүүрлэсэн юм.
Мөн Израилийн хяналтад байсан бүсэд ажиллаж байсан “Газын Хүмүүнлэгийн Сан” хэмээх шинэ логистикийн байгууллагын хүнс түгээх цэгүүд рүү очихоор оролдсон хэдэн зуун хүн амь насаа алдсан байна.
Израиль Иран руу халдлаа гэх мэдээ тармагц өмнөх өлсгөлөнгийн аймшигт дурсамжинд автсан палестинчууд хүнс бөөнөөр нь худалдан авч эхэлсэн нь үнийн огцом өсөлтөд хүргэжээ.
25 кг гурилын үнэ өнгөрсөн долоо хоногт 30 шекель байсан бол одоо 80-100 шекель болж гурав дахин нэмэгдсэн байна. Элсэн чихэр, живх, ургамлын тос зэрэг бусад зайлшгүй хэрэгцээт барааны үнэ хоёр дахин өсжээ. “Газад өлсгөлөн дахин ирэхээс бид хамгийн их айж байна. Бүр буудлага, бөмбөгдөлтөөс ч илүү айж байна” гэж хойд Газаас гаралтай, долоон хүүхдийн эцэг, 50 настай Собхи Аль-Заанин хэлэв. Тэрээр үнийн өсөлтөөс өмнө илүү их хүнс нөөцлөхөөр зах руу явж байгаагаа хэлжээ. “Үнэ дахин нэмэгдэхээс өмнө хэрэгтэй зүйлээ авах гэж байна” гэв. Гэвч олон хүн дайнд гэр орон, ажил хөдөлмөрөө алдсан, хадгаламжаа бараад дууссан тул их хэмжээгээр нөөцлөх боломжгүй байна.
Таван хүүхдийн ээж, 49 настай Умм Мохаммед Хижази “Бусад шиг их хэмжээний хүнс авч хадгалах мөнгө надад алга” гэв. Тэдний гэр дайнд сүйдэж, таван удаа нүүлгэн шилжжээ.
“Аз болоход хүмүүнлэгийн байгууллагуудаас авсан багахан хүнс байна. Хэрэв хил хаалттай хэвээр байвал хэд хоног л хүрэлцэх байх” гэжээ.
Израиль Газад эзлэн түрэмгийлэгч талын хувьд энгийн иргэдийг хангалттай хүнсээр хангах хууль зүйн үүрэгтэй гэж Норвегийн Дүрвэгсдийн Зөвлөлийн тэргүүн Ян Эгеланд онцолсон байна. Түүний хэлснээр энэ үүрэг Ирантай хийж буй дайнаас үл хамааран хүчин төгөлдөр хэвээр.
НҮБ-ын дэмжлэгтэй шинжээчдийн арванхоёрдугаар сард гаргасан тайланд Газ дахь палестинчуудын бараг тавны дөрөв нь хүнсний хурц дутагдалд орсон гэж анхааруулсан байна. Хойд Газын Худалдаа, Аж Үйлдвэрийн Танхимын нарийн бичгийн дарга Баха Аль-Амауигийн хэлснээр агуулахууд сүйдсэн, Израилийн хяналтын тогтолцоо тогтворгүй байгаа зэргээс шалтгаалан стратегийн нөөц бүрдүүлэх боломжгүй аж.
Эх сурвалж: The Guardian
СЭТГЭГДЭЛ БИЧИХ