Олон улсын уулчдын холбооноос зохион байгуулдаг Мөсөнд авиралтын Дэлхийн цомын аварга шалгаруулах 2026 оны дөрөв дэх цуврал тэмцээн Канадын Эдмонтон хотод болж, Монголын тамирчдаас Н.Сэлэнгэ түрүүллээ.
Мөсөнд авиралтын дэлхийн цомын хурдны төрөлд авхаалж самбаа, хурд хүчээ сорин өрсөлдсөн түүний хувьд 2025-2026 оны улирлын тэмцээнээс хоёр дахь алтан медалиа зүүж, Эдмонтонд анх удаа төрийн дууллаа эгшиглүүлэв. Түүнчлэн шинэчилсэн чансаагаар 310 оноогоор бүх тамирчныг тэргүүлжээ. Ингэснээр хоёр жил дараалан дэлхийн чансааг тэргүүллээ. Түүний хувьд сүүлийн хоёр жилийн хугацаанд дэлхийн цомын есөн цуврал тэмцээнд оролцохдоо таван алт, нэг мөнгөн медаль хүртсэнээс гадна гурван удаа шагналт IV байр эзэлжээ. Монгол төрийн дууллаа тэрбээр БНСУ, Швейцар, Франц, АНУ, Канад гэсэн 5 өөр улсад эгшиглүүлэв.
Тэгвэл олон улсын хэмжээний мастер Ч.Мандахбаяр Эдмонтоны тэмцээнээс хүрэл медаль хүртэв. Түүний хувьд энэ улирлыг дэлхийн цомын цувралаас хүрэл медальтай дуусгаснаар чансааны гуравт эрэмбэлэгдлээ. Харин Н.Хэрлэн VI, О.Сайханжаргал VIII байрт жагсав.
Ташрамд дурдахад, Н.Сэлэнгэ, Н.Хэрлэн, О.Сайханжаргал, Ч.Мандахбаяр нар 2025-2026 оны улирлын дөрвөн тэмцээнээс хурдны төрөлд хоёр алт, хоёр мөнгө, хоёр хүрэлтай дуусгалаа.
СЭТГЭГДЭЛ БИЧИХ