АНУ болон Израилийн Ираны эсрэг эхлүүлсэн цэргийн ажиллагаа гурав дахь өдрөө үргэлжилж, бүс нутаг даяар өргөн хэмжээний агаарын цохилтууд солбилцсоор байна. Сүүлийн үеийн гол мэдээллийг нэгтгэн хүргэж байна.
АНУ-ын Ерөнхийлөгч Доналд Трамп видео мэдэгдэл хийхдээ Ираны эсрэг “байлдааны ажиллагаа манай бүх зорилго биелтэл үргэлжилнэ” гэж мэдэгдэв. Тэрээр АНУ-ын талаас “цаашид ч амь үрэгдэгсэд гарах магадлалтай” хэмээн анхааруулсан байна. АНУ-ын Төв команд (CENTCOM)-ын мэдээлснээр Ираны цохилтын улмаас АНУ-ын гурван цэргийн алба хаагч амиа алдаж, тав нь хүнд шархаджээ.
Даваа гаригийн үүрээр Израиль Ливанд байрлах Хезболла-гийн бай гэж тодорхойлсон объектуудыг агаараас цохисон байна. Үүний өмнө тус бүлэглэл Израилийн хойд бүс рүү пуужин харвасан аж. Hezbollah өөрийн мэдэгдэлдээ Ираны дээд удирдагч Али Хаменей амь үрэгдсэний хариуд “өөрийгөө хамгаалах хууль ёсны ажиллагаа” явуулсан гэж тайлбарлажээ.
Ираны эрх баригчдын мэдээлснээр охидын сургуульд туссан цохилтын улмаас дор хаяж 153 хүн амиа алдсан байна. Ираны Ерөнхийлөгч уг халдлагыг “балмад, хүнлэг бус үйлдэл” хэмээн буруушаав.
Үүний зэрэгцээ Ираны пуужингууд Израилийн Бейт-Шемеш хотод тусч, Израилийн яаралтай тусламжийн байгууллагын мэдээлснээр дор хаяж есөн хүн амиа алдсан нь энэ дайны эхэлснээс хойших Израиль дахь хамгийн олон хохиролтой халдлага боллоо.
Бүс нутгийн нөлөө улам тэлж, Арабын Нэгдсэн Улс Ираны хариу цохилтуудын улмаас гурван хүн амиа алдсан гэж мэдээлэв. Мөн Бахрейн, Иракийн Эрбил хот, Иордан улсад дэлбэрэлтийн чимээ сонсогдсон тухай мэдээллүүд гарчээ. Азийн зах зээл нээгдэхтэй зэрэгцэн дэлхийн газрын тосны үнэ огцом өссөн байна.
Их Британийн Ерөнхий сайд Кейр Стармер АНУ-д Британийн цэргийн баазаас хамгаалалтын ажиллагаа явуулахыг зөвшөөрөх ч “одоогоор довтлох ажиллагаанд нэгдэхгүй” гэдгээ мэдэгдэв. Үүнтэй зэрэгцэн Их Британийн Батлан хамгаалах яам Кипрт байрлах RAF Akrotiri баазад сэжигтэй дроны халдлага гарсан бөгөөд Хааны нисэх хүчин хариу арга хэмжээ авч буйг баталлаа. Одоогоор хүний амь нас эрсдээгүй гэж BBC мэдээлэв.
Ливаны нийслэл Берут хотод оршин суугчид шөнийн 03:00 цагийн орчимд дараалсан хүчтэй дэлбэрэлтэд сэрсэн байна. Израилийн арми Хезболлог Ираны ашиг сонирхлын төлөө үйл ажиллагаа явуулж, Израилийн энгийн иргэдийг онилсон хэмээн буруутгаж, “хойд Израилийн иргэдэд заналхийлэхийг зөвшөөрөхгүй” гэж мэдэгдэв.
2024 онд АНУ-ын зуучлалаар Израиль, Ливан хоёр гал зогсоох хэлэлцээр байгуулж, нэг жил гаруй үргэлжилсэн мөргөлдөөнийг зогсоосон ч түүнээс хойш хоёр тал бие биеэ хэлэлцээр зөрчсөн гэж харилцан буруутгасаар ирсэн. Нийгмийн сүлжээнд тархсан бичлэгүүдэд Бейрутын өмнөд захын Дахие дүүргийн дээгүүр утаа суунаглаж, нисэх онгоцны буудал руу чиглэсэн гол замууд түгжирч, иргэд олноороо хотыг орхин гарч буй нь харагдаж байна.
Мөргөлдөөн ийнхүү өргөжиж, Ойрх Дорнод даяар тогтворгүй байдал нэмэгдэж буй энэ үед олон улсын хамтын нийгэмлэг дайны цар хүрээ улам тэлэх вий гэсэн болгоомжлол үүсээд байна
СЭТГЭГДЭЛ БИЧИХ