Хятадад хүн дүрст роботууд Цагаан сарын баярын үзүүлбэрт оролцож байна

 

Хятадад хүн дүрст роботууд Цагаан сарын баярын энтертайнмент шоуны нэг хэсэг болж, уг роботын үйлдвэрлэгч компани нь роботын дуулах, бүжиглэх ур чадварыг олон нийт, хөрөнгө оруулагчид болон төрийн албаныханд танилцуулж байна. Ням гарагт Шанхайд байрлах робот технологийн стартап Agibot бараг нэг цаг үргэлжилсэн шууд дамжуулалт хийж, роботууд бүжиглэх, акробат үзүүлэх,  дуулах, хошин жүжигт тоглох зэрэг үзүүлбэр үзүүлжээ. Мөн бусад роботууд үзэгчдийн хэсгээс гараа даллаж байв.

Энэхүү шоуг Хятадын Douyin платформ дээр ойролцоогоор 1.4 сая хүн үзсэн байна. Agibot энэхүү арга хэмжээг “дэлхийн анхны роботын тоглолт” гэж нэрлэсэн ч нийт үзэгчдийн тоог тодорхой мэдээлээгүй байна.

 

Роботууд төрийн томоохон шоунд оролцох болсон нь

Тоглолт нь Хятадын төрийн телевизээр жил бүр зохион байгуулагддаг Цагаан сарын баярын алдарт шоунаас долоо хоногийн өмнө болсон юм. Энэ шоу нь робот үйлдвэрлэгчдийн технологийн амжилтаа харуулах чухал мөч байсан. 2025 оны төрийн телевизийн баярын шоунд Unitree компанийн 16 хүн дүрст робот бүжигчидтэй хамтран үзүүлбэр үзүүлж, олон сая үзэгчдийг гайхшруулсан. Үүнээс гурван долоо хоногийн дараа тус компанийн үүсгэн байгуулагч БНХАУ-ын дарга Ши Жиньпин даргалсан өндөр түвшний уулзалтад уригдсан бөгөөд тус компани IPO хийх боломжийг судалж эхэлжээ. Сонирхолтой нь, энэ жилийн төрийн телевизийн шоудад Unitree, Galbot, Noetix, MagicLab зэрэг дөрвөн роботын компани оролцохоор төлөвлөж байна.

Agibot-ын зохион байгуулсан тоглолтод 200 гаруй робот оролцсон бөгөөд RedNote, Weibo, TikTok, Douyin зэрэг олон нийтийн сүлжээгээр цацагджээ. Мөн зарим телевизүүд дамжуулсан байна. Weibo сүлжээнд 4.8 сая дагагчтай гэрэл зурагчин Ма Хуньюнь “Роботууд Цагаан сарын утга учрыг ойлгож, хошин мэдрэмжтэй болж эхэлбэл хүн-роботын харилцаа бидний бодсоноос хурдан хөгжих боломжтой” гэж бичжээ. Agibot компани роботуудыг боловсрол, үйлдвэрлэл, энтертайнмент зэрэг олон салбарт ашиглах зорилготой бөгөөд Хонконгийн хөрөнгийн биржид IPO хийхээр төлөвлөж байгаа талаар Reuters мэдээлсэн байна.

 

Олон улсын өрсөлдөөн

Tesla компанийн гүйцэтгэх захирал Илон Маск хиймэл оюун ухаан болон Optimus хүн дүрст робот хөгжүүлэхэд анхаарч байгаа бөгөөд роботын салбарт өөрт нь бодит өрсөлдөгч бол Хятадын компаниуд гэж мэдэгдсэн. Маск мөн Optimus роботыг 2024 онд арга хэмжээнд барменаар ажиллуулж сурталчилж байжээ.

Эх сурвалж: Reuters