Япон улс 2031 он гэхэд Тайваний ойролцоох алслагдсан арал дээр пуужин байрлуулахаар төлөвлөж байгаагаа Батлан Хамгаалахын Сайд мэдэгдлээ. Энэ шийдвэр нь БНХАУ-тай үүсээд буй хурцадмал байдлыг нэмэгдүүлэх магадлалтай байна.
Агаарын довтолгооноос хамгаалах, нисэх онгоц болон баллистик пуужинг сөнөөх чадвартай агааын ангиллын пуужинг Японы баруун захын арал болох Йонагунид 2031 оны гуравдугаар сар гэхэд байрлуулах ажээ. Батлан хамгаалахын сайд Шинжиро Койзүми энэ талаар анх удаа тодорхой хуваарь танилцуулсан байна.
“Дэд бүтцийн бэлтгэл ажлаас хамаарна, гэхдээ 2030 онд багтаан хэрэгжүүлэхээр төлөвлөж байна” хэмээн тэрээр сэтгүүлчдэд хэлжээ.
Энэхүү мэдэгдэл нь Япон, Хятадын хооронд дипломат маргаан ширүүссэн үед хийгдээд буйгаараа онцлогтой. Японы Ерөнхий сайд Санаэ Такаичи өнгөрсөн арваннэгдүгээр сард Тайванийн аюулгүй байдлын талаар мэдэгдэл хийхдээ, хэрэв Хятад Тайваньд халдвал Японы өөрийгөө хамгаалж "болзошгүй" гэж парламентын гишүүдэд хэлсэн юм. Тэрээр энэ мэдэгдэлдээ бат зогсохоо энэ удаагийн үйлдлээрээ бататгаж байна.
Үүний дараа БНХАУ-ын зүгээс Хятадын иргэдийг Япон руу зорчихгүй байхыг уриалж, мөн “давхар хэрэглээний” бүтээгдэхүүний Япон руу чиглэсэн зарим экспортыг хязгаарласан байна. Хятадын албаныхны үзэж буйгаар эдгээр компаниуд Японы “дахин зэвсэгжилт”-ийг дэмжиж байгаа гэв.
Йонагуни арал нь Тайваниас ердөө 100 км зайд оршдог бөгөөд аль хэдийн Японы Өөрийгөө хамгаалах хүчний баазтай. Тус аралд 1500 орчим хүн амьдардаг бөгөөд бүс нутгийн болзошгүй цэргийн мөргөлдөөнд өртөх вий гэсэн болгоомжлол оршин суугчдын дунд нэмэгдэж байна.
2015 онд оршин суугчид санал асуулгаар 632 нь дэмжиж, 445 нь эсэргүүцсэн дүнгээр Өөрийгөө хамгаалах хүчний бааз байрлуулахыг зөвшөөрч байв. Одоогоор 160 орчим алба хаагч уулын орой дахь радарын станцаас Хятадын тэнгисийн цэргийн хөдөлгөөнийг 24 цагийн турш ажиглаж байна.
Япон улс 2022 онд Оросоос ирэх аюул заналхийлэлд төвлөрч байсан аюулгүй байдлын бодлогоо өөрчилж, Зүүн Хятадын тэнгист Хятадын цэргийн идэвхжил нэмэгдэж буйтай холбоотойгоор баруун өмнөд алслагдсан арлуудын хамгаалалтыг бэхжүүлэхээр шийдвэрлэсэн юм.
СЭТГЭГДЭЛ БИЧИХ