ОХУ-ын Гадаад хэргийн сайд Сергей Лавров АНУ-ыг хоёр улсын харилцааг сайжруулах оролдлогыг санаатайгаар гацааж, Украины дайныг зогсоох хэлэлцээг сулруулж байна хэмээн буруутгалаа.
“Дайныг зогсоох шаардлагатай гэж Трампын засаг захиргаа хэдий олонтаа мэдэгдэж байгаа ч Украины тусгай цэргийн ажиллагаа эхэлснээс хойш Жо Байдены үед ОХУ-д оноосон бүх шийтгэлийн хуулиудыг цуцлах талаар шийдвэрт хүрэхгүй байна” гэж Лавров даваа гарагт TV BRICS сувагт өгсөн ярилцлагадаа онцолжээ. “Бодит байдал дээр үүний эсрэг зүйл болж байна. Шинэ хориг арга хэмжээнүүд нэмж хэрэгжиж, НҮБ-ын Далайн эрх зүйн конвенцыг зөрчин, олон улсын усан замд хориглосон үйл ажиллагаа явуулж байна” хэмээн тэрээр хэлжээ.
Өнгөрсөн аравдугаар сард АНУ Оросын хамгийн том газрын тос үйлдвэрлэгчид болох Лукойл болон Роснефть компанид хориг тавьсан нь Трамп ерөнхийлөгчөөр ажиллаж эхэлснээс хойш Москвад чиглэсэн анхны томоохон хориг арга хэмжээ болсон юм. Үүний дараа Лукойл гадаад дахь ихэнх хөрөнгөө худалдахаас өөр аргагүйд хүрчээ. Трамп ерөнхийлөгчөөр сонгогдсон даруйдаа Украины дайныг “эхний өдөртөө” зогсооно гэж амлаж байсан ч энхийн хэлэлцээг зуучлах оролдлогууд бараг эхэлмэгцээ зогсонги байдалд орсон. Гэсэн ч тэрээр Оростой харилцаагаа сайжруулах, цаашлаад хоёр улсын хооронд бизнесийн боломж нээгдэнэ гэж найдаж байгаагаа удаа дараа илэрхийлсэн хэвээр байна.
Лукойл болон Роснефть компанид тавьсан хориг нь Трамп наймдугаар сард Аляскад ОХУ-ын Ерөнхийлөгч Владимир Путинтэй уулзсаны дараа хэрэгжсэн бөгөөд Кремлийн албаны хүмүүсийн мэдээлснээр уг уулзалтаар Украины дайныг зогсоох чиглэлд тодорхой “ойлголцолд” хүрсэн аж. “Украины асуудлаар санал болгож буй зүйлсээс цаашлаад эдийн засгийн салбарт ч эерэг төлөв харагдахгүй байна” хэмээн Лавров ярилцлагадаа дурдсан байна. Тэрээр ОХУ АНУ-тай хамтран ажиллахад нээлттэй хэвээр байгаа ч “энэ замд саад бэрхшээлийг америкчууд өөрсдөө зохиомлоор бий болгож байна” гэж мэдэгджээ. Орос, Украин, АНУ-ын төлөөлөгчид он гарснаас хойш Абу Дабид энхийн хэлэлцээний хоёр шатны уулзалт хийсэн ч газар нутгийн эмзэг асуудлаар одоогоор ямар нэгэн тохиролцоонд хүрч чадаагүй байна. Харин Украины Ерөнхийлөгч Владимир Зеленский энэ амралтын өдрүүдэд АНУ хоёр талд дайныг зургаадугаар сар гэхэд дуусгах шахалт үзүүлж байгааг мэдэгдсэн юм.
СЭТГЭГДЭЛ БИЧИХ