Францын нийслэл Парис хот дахь дэлхийн хамгийн том, хамгийн нэр хүндтэй музей болох Луврын музейн захирал Лоранс де Кар мягмар гарагт албан тушаалаасаа огцорлоо. Түүний огцрох шийдвэр нь өнгөрсөн жил гарсан, “зууны хулгай” хэмээн нэрлэгдсэн дуулиант хэргийн дараах хариуцлагын алхам боллоо.
Өнгөрсөн онд музейн Аполло галерейд хулгайчид нэвтэрч, Францын титмийн үнэт эдлэлээс нийт 88 сая еврогийн (ойролцоогоор 100 сая ам.доллар) үнэ бүхий үнэт зүйлсийг дээрэмдсэн юм. Энэ хэрэг нь тус музейн аюулгүй байдлын тогтолцоонд ноцтой асуудал байгааг илчилсэн.
Францын Ерөнхийлөгч Эммануэл Макрон Лоранс де Карын огцрох өргөдлийг хүлээн авснаа мэдэгдэж, “дэлхийн хамгийн том музей тогтвортой байдал, шинэ эрч хүч шаардлагатай энэ үед түүний гаргасан шийдвэр бол хариуцлагатай алхам” хэмээн онцолсон талаар Елисейн ордон мэдээлжээ. Лоранс де Кар өмнө нь огцрох хүсэлтээ гаргасан ч тухайн үед нь татгалзсан байдаг. Тэрбээр музейн “үнэт өв санг хамгаалах техникийн дэд бүтэц туйлын хоцрогдсон, бүр зарим талаар огт байхгүйтэй адил” байгааг хүлээн зөвшөөрч, үүнийг “аймшигтай явдал" гэж тодорхойлж байв.
2024 онд Луврын музей нийт 8.7 сая зочин хүлээн авсан бөгөөд нийт жуулчдын 13 хувийг АНУ-аас ирсэн жуулчид эзэлж, францчуудын дараа хоёрдугаарт бичигджээ.
Энэхүү дуулиант хулгайн хэрэг нь Луврт тулгараад байсан бусад асуудлуудтай давхцсан юм. Өнгөрсөн жил музейн ажилтнууд хэт их ачаалал, хүний нөөцийн дутагдал, ажлын нөхцөлийн хүндрэл зэргийг эсэргүүцэн ажил хаялт зарлаж байв.
Лоранс де Кар 2021 оны есдүгээр сард Луврын музейн захирлаар томилогдож, 230 жилийн түүхэндээ анхны эмэгтэй захирал болсон түүхэн хүн юм. Түүний огцролт нь Францын соёлын салбарт томоохон өөрчлөлтийн эхлэл болж магадгүй байна.
СЭТГЭГДЭЛ БИЧИХ