Өмнөд Солонгосын алдарт хамтлаг BTS дөрвөн жилийн дараах анхны бүрэн хэмжээний тоглолтоо хийхээр болсонтой холбогдуулан Сөүл хотод 260 мянга орчим үзэгч цугларах төлөвтэй байна. Гуравдугаар сарын 21-нд болох тоглолтын тасалбар худалдаанд гарсан даруйдаа дуусч, захиалгын систем гацсан нь эрэлт ямар өндөр байгааг илтгэв.
Тоглолт Сөүлийн төв хэсэгт байрлах Gwanghwamun Square-т, түүхэн Gyeongbokgung Palace ордны өмнөх задгай талбайд болно. Оройн 20:00 цагт тасалбарын бүртгэл нээгдэхэд 100 мянга гаруй хүн нэгэн зэрэг цахим хуудсанд хандсанаар систем ачааллаа дийлэлгүй гацсан байна. Нийт 15 мянган тасалбар хэдхэн хормын дотор зарагджээ.
Сөүл хотын цагдаагийн газар тасалбар худалдаалагдахаас өмнө луйврын шинжтэй зарууд цахим орчинд тархаж эхэлсэн тул сэрэмжлүүлэг гаргасан байна. Хотын цагдаагийн дарга Пак Жон-бо зуучлан авч өгөх нэрийдлээр 10 мянгаас 300 мянган вонын хураамж нэхсэн, эсвэл 100 мянгаас 1.2 сая воноор дахин худалдаална хэмээн зарласан 34 постыг устгуулахаар хүсэлт гаргасан гэж мэдэгдэв.
Нэгдүгээр сард батлагдсан тасалбар дамлан худалдаалахтай тэмцэх хуульд зааснаар анхны үнийн дүнгээс 50 дахин их хэмжээний торгууль ногдуулах боломжтой болсон. Өмнөд Солонгосын Ерөнхийлөгч дэлхийн аялан тоглолтын хүрээнд Бусанд буудлын үнэ хэт өссөнтэй холбоотой мэдээлэлд хариу өгч, “зах зээлийн дэг журмыг эвдэж, нийтэд ихээхэн хохирол учруулж буй шударга бус ашиг хонжоог буруушаан, хууль бус орлогоос давсан шийтгэл оногдуулах ёстой хэмээн мэдэгдсэн.
Нэг цаг үргэлжлэх энэхүү тоглолтоор хамтлаг шинэ “Arirang” цомгоо танилцуулж, 82 хотыг хамарсан дэлхийн аялан тоглолтоо эхлүүлэх юм. Тоглолтыг Netflix платформоор дамжуулан 190 оронд шууд дамжуулна. Мөн Сөүл хотын захиргаа ойролцоох бүсэд 30 мянга орчим хүнд зориулсан арга хэмжээнүүд зохион байгуулахаар төлөвлөжээ.
Энэхүү үйл явдал “BTS-номикс” хэмээн нэрлэгддэг эдийн засгийн нөлөөллийг дахин идэвхжүүлж байна. Жуулчлал, зочид буудал, жижиглэн худалдааны салбарт асар их орлого авчирдаг тус хамтлагийн эргэн ирэлттэй зэрэгцэн төв Сөүл дэх буудлуудын үнэ огцом өсч, зарим нь энгийн үеийнхээс тав дахин нэмэгдсэн байна.
Олон нийтийн аюулгүй байдлыг хангах үүднээс цагдаагийн байгууллага Гванхвамун талбайг “виртуал цэнгэлдэх хүрээлэн” болгон зохион байгуулж, 29 орц гарцыг тусгайлан хянах аж. Ойролцоох метроны буудлууд болон авто замын хөдөлгөөнд саатал үүсэхийг анхааруулжээ. Үүнтэй холбоотойгоор Sejong Center for the Performing Artsгуравдугаар сарын 21-ний бүх тоглолтоо цуцалсан бол Үндэсний түүхийн музей мөн тухайн өдөр хаалгаа барихаар болсон байна.
Дөрвөн жилийн дараах BTS-ийн эргэн ирэлт зөвхөн хөгжмийн ертөнцөд бус, хотын дэд бүтэц, эдийн засаг, хууль эрх зүйн орчинд хүртэл нөлөөлөх хэмжээний томоохон үйл явдал болж байна.
Эх сурвалж: The Guardian
СЭТГЭГДЭЛ БИЧИХ