Москва хотын төв хэсэгт орших Савёловскийн төмөр замын буудлын талбайд мягмар гарагийн шөнө дэлбэрэлт болж, ОХУ-ын нэг цагдаагийн алба хаагч амиа алдаж, хоёр хүн шархадсан талаар Оросын Дотоод хэргийн яам мэдээллээ.
Тус яамны Telegram хуудсанд мэдээлснээр дэлбэрэлт шөнийн 00:00 цаг өнгөрсний дараахан болсон байна. Хойд Москва дахь Савёловскийн буудал нь нийслэлийн гол төмөр замын нэг юм.
Мэдэгдэлд дурдсанаар, халдлага үйлдэгч замын цагдаагийн алба хаагчид сууж байсан эргүүлийн автомашинд ойртож очоод тэсрэх төхөөрөмж дэлбэлсэн байна. Дэлбэрэлтийн улмаас нэг алба хаагч газар дээрээ амиа алдаж, хоёр нь шархаджээ. Харин халдлага үйлдсэн этгээд мөн хэргийн газарт нас барсан гэж мэдээлсэн байна.
Оросын төрийн өмчит ТАСС агентлагийн мэдээлснээр, онилсон эргүүлийн автомашин ихээхэн эвдэрсэн ч гал аваагүй аж. Орон нутгийн хэвлэлүүд төмөр замын ойролцоо зогсож байсан, цонх нь хагарсан цагдаагийн машины зургийг нийтэлжээ.
Дэлбэрэлтийн дараа тухайн бүсийг цагдаагийнхан бүслэн хамгаалалтад авч, хэд хэдэн түргэн тусламжийн машин очсон байна. Анхны мэдээллээр халдлага үйлдэгч зугтсан гэж мэдэгдсэн ч, удалгүй хэргийн газрыг шалгаж, хяналтын камерын бичлэгийг нягталсны дараа уг этгээдийг газар дээрээ нас барсан байдалтай олсон гэж яамнаас мэдээлжээ.
Албаныхан тэсрэх төхөөрөмжийн төрөл болон халдлагын сэдлийн талаар одоогоор дэлгэрэнгүй мэдээлэл өгөөгүй байна.
ОХУ-ын Мөрдөн байцаах хороо уг хэргийг хууль сахиулах байгууллагын алба хаагчийн амь насанд халдахыг завдсан болон тэсрэх төхөөрөмж хууль бусаар хадгалсан гэх үндэслэлээр эрүүгийн хэрэг үүсгэн шалгаж эхэлсэн гэж мэдэгдлээ.
2025 оны арванхоёрдугаар сард Москва хотын өмнөд хэсэгт сэжигтэй этгээдийг шалгах үеэр мөн дэлбэрэлт болж, хоёр цагдаа амиа алдаж байсан. Тухайн хэрэг нь хэдхэн хоногийн өмнө Оросын нэгэн генерал амиа алдсан хэргийн ойролцоо гарсан юм.
Москва Украинтай дөрвөн жил үргэлжилж буй дайны нөхцөлд Оросын армийн албан тушаалтнуудын эсрэг халдлага, аллага цөөнгүй гарсаар байна.
Энэ сарын эхээр Оросын цэргийн тагнуулын дээд албан тушаалтан буудуулж шархадсан бөгөөд Москва уг халдлагын ард Киевийг буруутгасан юм.
СЭТГЭГДЭЛ БИЧИХ