"Эрдэнэт үйлдвэр" ТӨҮГ гаалийн үйл ажиллагаанд үүсээд буй хүндрэл, зохицуулалтын зөрчлийг шийдвэрлэх зорилгоор Гаалийн ерөнхий газар, Геологийн судалгаа шинжилгээний төв, Орхон аймгийн Гаалийн газартай хамтарсан хэлэлцүүлгийг өнөөдөр зохион байгууллаа.
Хэлэлцүүлэгт "Эрдэнэт үйлдвэр" ТӨҮГ-ын Ерөнхий захирал Г.Ёндон, Захиргаа, удирдлага, санхүүгийн газрын дарга Д.Баярбат, Худалдан авах ажиллагааны газрын дарга С.Энхмандах болон гаалийн харилцаанд оролцогч нэгжүүдийн удирдлага, мэргэжилтнүүд, мөн Гаалийн ерөнхий газрын холбогдох газрын дарга нар, гаалийн улсын байцаагчид, ахлах мэргэжилтнүүд оролцов.
Хэлэлцүүлгээр экспортын гаалийн бүрдүүлэлт, лабораторийн шинжилгээ, цахим системийн уялдаа зэрэг асуудлыг хэлэлцсэн байна.
Эрдэнэт үйлдвэрийн зүгээс АМНАТ-ын тооцоололд үүсэж буй зөрүү, цахим системийн уялдааны алдаа, тохирлын гэрчилгээний цахим шилжилтийн хүндрэл, автомат анализаторын ашиглалт болон засвар үйлчилгээ, төлбөр тооцооны мэдээллийн хүртээмж зэрэг асуудлыг танилцуулж, 2024-2026 оны судалгаанд үндэслэн шийдвэрлэх санал боловсруулснаа хүргэв.
Мөн тус үйлдвэр 2023 онд гаалийн итгэмжлэгдсэн аж ахуйн нэгжийн гэрчилгээ авснаас хойш худалдааг хөнгөвчлөх чиглэлд ахиц гарч байгааг онцоллоо. Тухайлбал, БНХАУ-ын итгэмжлэгдсэн лабораторийн 2016-2024 оны шинжилгээний дүнгээр экспортын баяжмал дахь зарим элемент зөвшөөрөгдөх хэмжээнээс 3-133 дахин бага болох нь тогтоогдсон тул 2025 оноос ачилт бүрд давтан химийн шинжилгээ шаардахгүй болсон байна. Үүний үр дүнд экспортын зардлыг жилд 620-630 мянган ам.доллароор бууруулах боломж бүрдсэн бөгөөд зэс, молибдены баяжмалыг тохирлын баталгаажуулалтаас чөлөөлбөл жил бүр 200 орчим сая төгрөг хэмнэх тооцоо гарчээ.
Харин Гаалийн ерөнхий газар төв лабораторийн шинэчлэл болон цахим шилжилтийн ажлын явцыг танилцуулж, үндэсний томоохон экспортлогч үйлдвэрүүдийн үйл ажиллагааг дэмжин ажиллахаа илэрхийллээ.
СЭТГЭГДЭЛ БИЧИХ