Ч.Тэмүүлэн эх орныхоо өмнө үүрэг хүлээж, хилчин болохоор Сэлэнгэ аймгийн Хилийн 0243 дугаар ангид сайн дураараа ирсэн залуусын нэг юм.
Тэрбээр “Шинэ Монгол Технологийн Коллеж”-ийг 2023 онд, Япон улсын Айчи мужийн Тоёохаши хот дахь Тоёохаши Технологийн Их сургуулийг 2026 онд төгсөж, улмаар эх орондоо ирээд цэргийн алба хаахаар шийджээ.
Бага наснаасаа цэргийн алба хаахыг мөрөөддөг байсан ч сургуульд сурч боловсрол эзэмшин, 24 нас хүртлээ хүслээ биелүүлэх боломж гараагүй байна. Харин их сургуулиа төгссөний дараа ч гэсэн эр цэргийн албыг хааж болдог гэдгийг мэдсэнээр 2025 оны турш бие бялдрын хөгжилдөө анхаарч, мөрөөдлөө биелүүлэхээр зорьжээ
Улмаар 2026 онд сургуулиа төгсөөд Монгол Улсын Хөдөлмөрийн баатар, зууны манлай хилчин, дэслэгч генарал Б.Цэдэн-Ишийн нэрэмжит Хилийн цэргийн 0243 дугаар ангид хуваарилагджээ. Ангиа өөрөө сонгоогүй ч энд томилогдсондоо баяртай байгаагаа тэрбээр онцолсон юм.
Мөн тэрбээр, Улаанбаатар хотын Сүхбаатар дүүргээс 5 дугаар сарын 2-нд цэргийн албанд татагдан, энэхүү ангидаа ирээд арав гаруй хонож байна. Энэ хугацаанд цэргийн алба хааж буй залуучуудтай нэг гэр бүл мэт дотно болсон тухайгаа ярив.
Одоогоор хилийн зурваст очоогүй байгаа бөгөөд карантины хугацаа дуусаж, тангаргаа өргөсний дараа заставт хуваарилагдах аж. Ч.Тэмүүлэн орос, англи, япон хэлтэй. Монгол-Оросын хамтарсан 3 дугаар сургуульд 10 дугаар анги хүртлээ суралцсан нь орос хэлтэй болоход нь нөлөөлжээ. Харин “Шинэ Монгол Технологийн Коллеж”-д суралцах хугацаандаа япон хэл сурчээ. Түүний хилчин болох хүсэл мөрөөдөлд нь Халх голын Их Бурхан заставт 2020 онд алба хааж байсан найзууд нь ихээхэн нөлөөлжээ. Тэр үеэс хилийн цэрэгт алба хаах хүсэл төрсөн байна.
Хилийн цэргийн албыг нэр төртэй хаах нь түүний ойрын бөгөөд цаашдаа эх орондоо хэрэгтэй, үнэ цэнтэй иргэн болохыг хүсдэг. Тэрбээр үеийнхээ залууст хандаж “Хилчин байна гэдэг хүн болгонд олдохгүй хувь заяа. Амьдралд асуудал, бэрхшээл тулгарах тусам хүн илүү хөгжиж, төлөвшдөг учраас залуусыг цэргийн албаа заавал хаагаасай гэж хүсэж байна” хэмээсэн юм.
СЭТГЭГДЭЛ БИЧИХ