Аялал жуулчлалын салбарын Азийн шилдэг эрдэмтэн, судлаачдыг нэгтгэдэг 15 дахь удаагийн Азийн аялал жуулчлалын форум /ATF 2026/ “Азийн аялал жуулчлал, зочлох үйлчилгээний хөгжил ба чиг хандлага” сэдвийн хүрээнд Улаанбаатар хотод 6 дугаар сарын 11-13-нд болно.
Уг форум Ази тивийн аялал жуулчлалын салбарт тулгарч буй хөгжлийн чиг хандлага, үйлчилгээний менежмент, маркетинг болон тогтвортой байдлын асуудлуудыг хэлэлцэх зорилготой. Монгол Улсад энэхүү форумыг зохион байгуулснаар монголын аялал жуулчлалын салбарын олон улсын нэр хүндийг нэмэгдүүлэх, судалгаа ба практикийн уялдаа холбоог бэхжүүлэх, олон улсын хамтын ажиллагааг өргөжүүлэх, хөрөнгө оруулалт, хамтарсан төсөл, сургалт, маркетингийн шинэ боломжийг бүрдүүлэх ач холбогдолтой.
Энэхүү форум Монголын аялал жуулчлалын салбарыг дэлхийн түвшинд таниулах, хөгжүүлэх томоохон боломж болох юм. Форумын үеэр БНСУ, Австрали, БНХАУ, Шри-Ланк, Камбож, АНУ, ХБНГУ, Монгол зэрэг 22 орноос 100 гаруй шалгарсан илтгэгч, эрдэмтэн судлаачид хүрэлцэн ирж гурван өдрийн туршид "Азийн аялал жуулчлал, зочлох үйлчилгээний хөгжил ба чиг хандлага " сэдвийн хүрээнд илтгэл хэлэлцүүлэг зохион байгуулах аж.
Форумыг Соёл, Спорт, Аялал Жуулчлал, Залуучуудын Яам болон Нийслэлийн аялал жуулчлалын газар, Аялал Жуулчлалын Мэргэжлийн Холбоо хамтран зохион байгуулж байгаа бөгөөд Аялал жуулчлалын боловсрол хөгжлийн нийгэмлэг болон АЖМХ-ны салбар холбоод тус форумыг дэмжин ажиллаж байна.
СЭТГЭГДЭЛ БИЧИХ