“Оюу толгой” компанийн Хөдөлмөр эрхлэлтийг дэмжих ажлын хэсгийн II улирлын ээлжит хурал, хэлэлцүүлгийг “Энержи ресурс” компанитай хамтран энэ сарын 17-ны өдөр зохион байгууллаа.
Тус хэлэлцүүлэгт Өмнөговь аймгийн Засаг даргын орлогч Ж.Занабазраар ахлуулсан ажлын баг оролцож, үйл ажиллагаатай танилцсан байна. Хэлэлцүүлгийн үеэр талууд хөдөлмөр эрхлэлтийг дэмжих бодлого, хамтын ажиллагааны хэрэгжилт болон орон нутгийн иргэдийн ажлын байрыг нэмэгдүүлэх чиглэлээр мэдээлэл солилцлоо.
Тодруулбал, “Энержи ресурс” компанид дөрөвдүгээр сарын 30-ны байдлаар 2833 ажилтан ажиллаж байгаагаас 1418 нь буюу 50 хувь нь Өмнөговь аймгийн иргэд байна. Харин “Оюу толгой” компанид орон нутгаас ажиллаж байгаа ажилтны тоо ойролцоогоор 3000 гаруйд хүрчээ.
“Энержи ресурс” компани нь Өмнөговь аймагтай 2017 оноос хамтын ажиллагааны гэрээ байгуулан ажиллаж байгаа бөгөөд ажилтнуудынхаа гэр бүлд ээлтэй, тав тухтай нөхцөл бүрдүүлэх, орон нутгийн иргэдийн хөдөлмөр эрхлэлтийг дэмжих чиглэлд сайн туршлагаа хуваалцсан байна.
Тус компани нь иргэд, залуучуудыг сургалтад хамруулан ажлын байранд бэлтгэх, хүний нөөц бүрдүүлэх, орон сууц, сургууль, цэцэрлэг, эмнэлэг зэрэг нийгмийн үйлчилгээний хүртээмжийг сайжруулахад анхаарч ажилладаг байна. Мөн “Цалинтай оюутан” хөтөлбөрт 200 гаруй оюутныг хамруулжээ. Түүнчлэн MSC академиар дамжуулан мэргэжилгүй ажил хайгчдыг суурь ур чадварт сургаж ажлын байранд зуучлах, ажилтнуудын ар гэрийн судалгаанд үндэслэн суурьшлын бодлого хэрэгжүүлэх зэрэг туршлагаа танилцуулсан байна.
СЭТГЭГДЭЛ БИЧИХ