Тесла болон SpaceX-ийн үүсгэн байгуулагч Илон Маск ням гарагт мэдэгдэл хийхдээ, SpaceX компанийн гол анхаарал одоо Саран дээр “өөрөө өсөж хөгжих хот” байгуулах зорилгод шилжсэн бөгөөд үүнийг арван жил хүрэхгүй хугацаанд хэрэгжүүлэх боломжтой гэжээ.
Тэрээр X платформ дээрээ бичихдээ, SpaceX нь Марс дээр хот байгуулах олон жилийн зорилгоосоо ухраагүй, ойрын 5–7 жилийн дотор Марсын хотын төслийг эхлүүлэх төлөвлөгөө хэвээр байгаа ч, “Иргэншлийн ирээдүйг баталгаажуулах нь нэн тэргүүний зорилт”хэмээн онцолсон байна.
Маскийн энэ байр суурь нь Wall Street Journal сонины баасан гарагт нийтэлсэн мэдээлэлтэй нийцэж байгаа бөгөөд тус нийтлэлд SpaceX компани хөрөнгө оруулагчдад Марсаас илүүтэй Сарны төслүүдийг түрүүлж хэрэгжүүлэх болсноо мэдэгдсэн тухай дурджээ. Тус компанийн зорилго нь 2027 оны гуравдугаар сард хүнгүй сансрын хөлгийг Саран дээр буулгах явдал аж. Хүн төрөлхтөн Сарны гадаргад хамгийн сүүлд 1972 онд Apollo 17 хөлгөөр хөл тавьснаас хойш дахин очоогүй байна.
Үүнээс гадна, ердөө долоо хоног хүрэхгүй хугацааны өмнө Маск өөрийн удирддаг хиймэл оюуны xAI компанийг SpaceX худалдан авсан тухай зарласан. Энэхүү хэлцэл нь SpaceX-ийг 1 их наяд ам.доллар, xAI-ийг 250 тэрбум ам.доллар-оор үнэлсэн томоохон наймаа байв. Энэ нэгдлийг дэмжигчид уг алхам нь сансарт байрлах дата төвүүд байгуулах SpaceX-ийн төлөвлөгөөг дэмжинэ гэж үзэж байна. Маск сансрын дата төвүүдийг газрын дата төвүүдээс илүү эрчим хүчний хэмнэлттэй гэж үздэг бөгөөд хиймэл оюуны хөгжлийн улмаас тооцооллын хэрэгцээ огцом өсөж байгаа энэ үед чухал шийдэл гэж тайлбарлажээ.
SpaceX энэ оны сүүлээр IPO (хувьцаагаа олон нийтэд санал болгох) хийх замаар 50 тэрбум ам.доллар босгох зорилготой байгаа бөгөөд амжилттай болвол түүхэн дэх хамгийн том IPO болох боломжтой байна. Даваа гарагт Маск X дээрх хэрэглэгчийн асуултад хариулахдаа, NASA энэ жил SpaceX-ийн нийт орлогын 5 хувиас бага хувийг бүрдүүлнэ гэж мэдэгджээ. SpaceX нь NASA-гийн Artemis хөтөлбөрийн гол гэрээт гүйцэтгэгч бөгөөд Саран дээр сансрын нисэгчдийг буулгах 4 тэрбум ам.долларын Starship гэрээтэй аж.
SpaceX-ийн стратегийг өөрчилж буйтай зэрэгцэн Маск өөрийн олон нийтэд бүртгэлтэй компани Tesla-г ч шинэ чиглэлд оруулж байна. Цахилгаан автомашины дэлхийн зах зээлийг үндсэндээ бий болгосны дараа энэ жил 20 тэрбум ам.доллар-ыг бие даасан жолоодлого (autonomous driving) болон роботын хөгжилд зарцуулахаар төлөвлөжээ.
Эх сурвалж: Reuters
СЭТГЭГДЭЛ БИЧИХ