АНУ-ын Ерөнхийлөгч Дональд Трамп БНХАУ-д хийж буй айлчлалынхаа үеэр тус улсын соёл иргэншлийн бэлгэдэл гэгддэг Тэнгэрийн сүмд (Тяньтань) зочиллоо.
Синьхуа агентлагийн мэдээлснээр, Цагаан ордны тэргүүн БНХАУ-ын удирдагч Ши Жиньпиний хамт Бээжин дэх тус түүхэн сүмийн цогцолбортой танилцжээ.
Д.Трамп, Ши Жиньпин нар өнөө өглөө болсон хоёр талын хэлэлцээний дараа Тэнгэрийн сүмийг зорьсон байна.
Хоёр улсын удирдагчид уг цогцолборын гол байгууламж болох “Арвин ургацын төлөөх залбирлын танхим”-ын өмнө хамтдаа зургаа татуулсан байна. Энэ танхимд Хятадын эзэн хаад тухайн жилийн ургац арвин байхын төлөө залбирдаг байжээ.
Аялал хэрхэн өнгөрсөн талаарх сэтгүүлчдийн асуултад хариулахдаа, Д.Трамп "энэ бол гайхалтай газар байна" хэмээгээд "Үнэхээр гайхалтай. Хятад улс маш үзэсгэлэнтэй юм" гэж хэлсэн байна.
Газар ба тэнгэрийн зохицол
XV зуунд баригдсан Тэнгэрийн сүм бол Хятадын соёл иргэншлийн ертөнцийг үзэх үзэл, түүнд дээд эрх мэдэл ямар байр суурь эзэлдэг тухай ойлголтуудыг шингээсэн архитектурын дурсгал юм.
Сүмийн цогцолборын шулуун, өнцөгт хэлбэрүүд нь газар дэлхийг, харин дугуй хэлбэр нь тэнгэрийг бэлгэддэг. Сүмийг барьснаас хойш олон зууны турш Хятадыг захирч байсан Мин, Чин гүрний үед эзэн хаад жил бүр ургац хураалтын улирал эхлэхийн өмнө энд ирж, тэнгэрт тахил өргөж, арвин ургац гуйн залбирдаг байжээ.
Эдгээр ёслол нь эзэн хааныг газар, тэнгэрийн хоорондох зуучлагч, сансар огторгуйн зохицлыг сахигч болгодог байв. Хэрэв эзэн хаан энэхүү зохицлыг хадгалахаа больчихвол тэнгэрийн ивээл түүнээс нүүр буруулж, эрх мэдлээ алддаг гэж үздэг байжээ.
Дэлхий дахины байдал ээдрээтэй болж, геополитикийн хурцадмал байдал нэмэгдэж буй энэ үед Д.Трампын айлчлалд зориулан Тэнгэрийн сүмийг сонгосон нь Хятадын талаас "Хоёр их гүрэн дэлхий дахины энх тайвны төлөө хамтран ажиллах ёстой" гэсэн дохиог илгээж байж магадгүй гэж ажиглагчид үзэж байна.
Бээжин хотын төвд зүүн өмнөд хэсэгт орших ил музей болох уг сүмийн цогцолборыг Д.Трампын айлчлалын өмнөх өдөр олон нийтэд хаажээ.
СЭТГЭГДЭЛ БИЧИХ