Токиогийн Шинжлэх ухааны хүрээлэн зөвхөн робот ажилладаг лаборатори нээжээ. Тус лабораторид өмнө нь хүн хийдэг байсан анагаах ухааны туршилтуудыг одоо роботууд гүйцэтгэж байна. Хүрээлэнгийн Юүшима кампус дээр байрлах Роботын инновацын төв нэртэй тэрхүү лабораторид одоогоор арван робот ажиллаж байгаа юм. Роботын инновацын төв огт хүнгүй үйл ажиллагаа явуулах чадвартай аж.
Тэдгээр роботуудын дунд Maholo LabDroid нэртэй хүн дүрст робот бий. Энэ робот хоёр гараараа лабораторийн нарийн үйлдлүүдийг хийдэг. Тухайлбал бодисыг маш нарийн дүнтэй тунгаар таслах, температурын хяналттай төхөөрөмжүүдтэй ажиллах зэрэг ажлыг гүйцэтгэдэг гэж "Japan Today" мэдээлжээ.
Роботууд эс өсгөвөрлөх ажлыг программчлалын дагуу автоматаар гүйцэтгэж чаддаг аж. Ингэснээр олон дахин давтагддаг туршилтын ажилд хүний оролцоог багасгасан байна.
Тус их сургууль цаашид роботуудын тоог нэмэгдүүлж, автомат системийг хиймэл оюун ухаантай холбохоор төлөвлөж байна. Тус сургууль 2040 он гэхэд лабораторийн роботын тоог 2 мянга орчимд хүргэх зорилго тавьжээ. Мөн ирээдүйд анагаах ухааны судалгааны бүх явцыг бараг бүхэлд нь автоматжуулах зорилготой ажиллаж байгаа аж. Энэ нь таамаглал дэвшүүлэхээс эхлээд туршилтаар батлах хүртэлх судалгааны бүх шатыг автоматжуулах урт хугацааны төлөвлөгөөний нэг хэсэг юм.
АНУ-ын "Insilico Medicine" биотехнологийн компани Supervisor нэртэй анхны хүн дүрст роботоо танилцуулжээ. Тус робот эм гаргаж авах автомат лабораторид ажиллаж байгаа аж. Тус компани биотехнологийн судалгааны лабораторио бүрэн автоматжуулах зорилготой ажиллаж байгаа юм.
Робот эхний ээлжид лабораторийн хяналт, үйл ажиллагааг хянах болон зочдод тайлбар хийх зэрэг ажлыг гүйцэтгэнэ. Явцдаа хүн дүрст роботууд бодис хэмжих, урвалж бодисуудыг зохицуулах, шинжлэх ухааны нарийн төхөөрөмжтэй ажиллах зэрэг илүү өндөр түвшний ажлуудыг хийдэг болох аж.
СЭТГЭГДЭЛ БИЧИХ