1986 онд ФИФА-гийн их хурлын үеэр эмэгтэйчүүдийн дэлхийн аваргыг байгуулах санал дэвшүүлсэн илтгэл Хойд Солонгосын төлөөлөгчдөд хүчтэй нөлөөлсөн гэдэг. Үүнээс хойш Пёньян эмэгтэйчүүдийн хөлбөмбөгийг улс төр, олон улсын нэр хүндийн хэрэгсэл болгон хөгжүүлэх стратеги хэрэгжүүлж эхэлжээ. Сургуулиудад хөлбөмбөгийн хөтөлбөр нэвтрүүлсэн нь богино хугацаанд үр дүнгээ өгсөн байна.
1990-ээд оноос 2010-аад он хүртэл Хойд Солонгос Азийн хамгийн хүчирхэг багуудын нэг болж, Азийн цомын гурван түрүү хүртсэн. Тэдний амжилтыг төрөөс сурталчилж, тоглогчдод орон сууц, нийслэлд амьдрах эрх зэрэг хангамж олгодог байв. Улс төрийн тусгаарлалтад орсон энэ улсын хувьд спорт нь олон улсад өөрийгөө харуулах ховор боломжийн нэг болсон юм.
Гэвч 2011 онд допингийн зөрчлөөс үүдэн дөрвөн жилийн хориг авч, дараагийн томоохон тэмцээнүүдийг өнжсөнөөр багийн уналт эхэлсэн. Цар тахал болон эдийн засгийн хориг арга хэмжээ ч олон улсын оролцоог нь хязгаарлажээ.
Харин урт хугацаанд хийсэн хөрөнгө оруулалт үргэлжилсээр, 2013 онд байгуулсан Пёньяны Олон улсын хөлбөмбөгийн сургуулийн төгсөгчид өсвөрийн дэлхийн аваргууд болж, Хойд Солонгосыг залуучуудын тэмцээнүүдийн хамгийн амжилттай багуудын нэг болгосон байна.
Одоо Азийн цомын тэмцээн тэдний хувьд жинхэнэ шалгуур болно. Эмэгтэйчүүдийн хөлбөмбөгөөр дамжин дахин Азийн оргилд хүрч чадах эсэх нь тун удахгүй тодорхой болох гэж байна.
Эх сурвалж: BBC
СЭТГЭГДЭЛ БИЧИХ