Норвегийн Элчин сайд Мона Юул Жеффри Эпстейний дуулиант хэрэгтэй холбогдсоны улмаас албан тушаалаасаа огцорсон байна. Тэрбээр Норвеги улсаас Иордан болон Иракт суугаа Элчин сайдаар ажиллаж байжээ. Норвегийн Гадаад хэргийн сайд Эспен Барт Эйде ням гарагт гаргасан мэдэгдэлдээ Мона Юулын Жеффри Эпштейнтэй холбоо тогтоож байсан нь “шийдвэр гаргалтад ноцтой алдаа гаргасны илрэл” хэмээн дүгнэсэн байна. “Энэхүү хэрэг нь тухайн албан тушаалд шаардлагатай итгэлцлийг дахин сэргээхэд бэрх болгож байна” гэж тэр мэдэгдэлдээ онцолжээ.
Ийм нөхцөлд Мона Юулын огцрох шийдвэр нь зөв алхам байсан гэж Гадаад хэргийн сайд тэмдэглэсэн байна. Шинээр ил болсон баримтуудын дараа Мона Юул болон түүний нөхөр, Норвегийн нэр нөлөө бүхий дипломатч асан Терже Рёд-Ларсен нар олон нийтийн хүчтэй шүүмжлэлд өртөөд байна. Хүүхдийн эсрэг бэлгийн гэмт хэрэгт буруутгагдсан, нэр хүндээ бүрэн алдсан санхүүч Жеффри Эпштейний гэрээслэлд тэдний хоёр хүүхдийн нэр орсон бөгөөд тус бүр нь 5 сая ам.доллар (ойролцоогоор 7.1 сая австрали доллар) өвлөхөөр тусгагдсан гэх мэдээлэл бий. Эпштейн уг гэрээслэлийг хорих ангид нас барахаасаа өмнө гарын үсэг зурсан гэж мэдээлжээ.
Шинэ Эпштейний баримтууд ил болсонтой холбоотойгоор асуудалд өртсөн Норвегичууд зөвхөн Мона Юул, түүний нөхрөөр хязгаарлагдахгүй байна. Тухайлбал, уг баримтуудад Норвегийн угсаа залгамжлах гүнж Метте-Марит, Ерөнхий сайд асан Торбьёрн Ягланд, Дэлхийн эдийн засгийн форумын тэргүүн Бёрге Бренде нарын нэрс мөн дурдагджээ.
СЭТГЭГДЭЛ БИЧИХ